Malikeliket iray agagi ed interon Ukraine ta sarag da lay manpulong lamet ed publiko tan balibali iray eksperiensya ra. Inreport na saray manangasikaso na sirkito tan saray elder diman ya dakel so totoon maliket ed impawil na saray literature cart tayo tan wala ni ingen iray nambaga ya a-miss day makanengneng na saray Tasi nen Jehova diad saray lugar da.

Naisip nen Tatiana, ya nanlapud Serhiivka Congregation diad Odesa Region ya bisitaen iramay apulongan to nensaman antis na pandemic. Oniay imbaga to, “Diad gapo ni labat, anengneng ko la ya bebendisyonan nen Jehova iray sagpot tayo ya ipawil so ministeryo tayo.” Aminsan, binisita toy sakey a bii ya ag-angawat na panangiyaral na Biblia antis na pandemic. Balet natan, labalabay la na bii ya pantongtongan iray nipaakar ed espiritual tan pinmayag ya tampol ya manaral na Biblia. Kanian kuan nen Tatiana, “Kaukolan kon bisitaen so amin ya datin RVk tan opresian ko ran amin na panag-aral na Biblia!”

Si Yevheniy tan Lilia et agagin datin tagad Mariupol. Kaiba irad saramay tinmaynan ed kaabungan da tan linmad mas safe iran lugar ed Ukraine. Regular iran mibibiang ed panagpulong. Imbaga ra ya makakatulong so ministeryo pian agda sankanonot ya lanang iray problema ra. Kuan da: “Amta mi ya manguman lan talagay bilay mi natan. Mair-irap so onggapo ed balon panagbilay, balet tatandaan mi ya aliwan antiktikey so lima nen Jehova. Walad sikami so espiritu to, tan akaparaan iray agagi tayo ya ontulong ed sikamin igapoy balon bilay diad balon pasen.”

Diad arum ya parte na bansa, mangiiter met na pantasi iray agagi tayo lapud saray maabig ya gagawaen da. Singa bilang, walay grupo na saray brother diad syudad na Mykolaiv ya tinmulong ed sakey ya international humanitarian relief organization pian apigeren tan uksoyen so sakey ya bodegan uusaren parad civilian aid. Inapiger na agagi so danum, imparaan da ray kabinet, tan inyuksoy da ray piga-pigaran tonelada na suplay. Nen ininspeksion na sakey ya representative na humanitarian organization so ginawa ra, akaakis iman ya bii. Kuan to, “Agko inilaloan ya onia karakep so pagmaliwan to.”

Anggano mair-irap so dadalanen na saray kaagian tayo ed Ukraine, nalilikna day liket lapud mansiasiansia ran aktibo ed ministeryo tan ag-ira ontutundan “manggawa na maabig.”—Galacia 6:9.

Nia ray bilang ya inreport anggad Hulyo 13, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet nayarin mas atagey ni so aktual ya bilang, lapud mair-irap ya pansiansiaen so komunikasyon ed amin ya lugar diad bansa.

• 42 ya manangipalapag so inatey

• 97 ya manangipalapag so asugatan

• 28,683 a manangipalapag so tinmaynan ed kaabungan da tan linmad mas safe iran lugar

• 524 ya abung so agaygay

• 588 ya abung so aderal ya maong

• 1,554 ya abung so medyo aderal

• 5 ya Kingdom Hall so aderal

• 10 ya Kingdom Hall so aderal ya maong

• 36 ya Kingdom Hall so medyo aderal

• 27 ya Disaster Relief Committee (DRC) so onkikiwas ed Ukraine

• 52,947 ya manangipalapag so direktan atulongan na saray DRC pian makaanap na mas safe ya napanayaman

• 23,863 ya manangipalapag so linmad arum ya bansa tan tutulongan ira na saray agagi diman