AGOSTO 12, 2022
UKRAINE
UPDATE #12 | Sankanengneng so Aroan na Agagi Legan na Krisis ed Ukraine
“Anggan say Guerra et Agto Napatunda so Kimey a Panagbangat”
Manlapu la nen Hulyo 23 anggad 31, abautismoan iray manangipalapag diad interon Ukraine tan diad arum ni ran bansa ya inalisan da legan na 2022 Anap Moy Kareenan! a Kombension. Base ed bilang ya inreport anggad nen Agosto 2, ami-amin et 1,113 ya nanlapud Ukraine so abautismoan. Oniay imbaga na sakey a brother ed Ukraine: “Anggan say guerra et agto napatunda so kimey a panagbangat ta impromisa nen Jesus: ‘Wala ak ed sikayo ed amin ya agew.’”—Mateo 28:20.
Maliket min ireport irayan eksperiensya.
Si Natalia ya tagad Kreminna, Luhansk Region, et 63 so edad to. Nen 1990’s, inyaralan na saray Tasi nen Jehova si Natalia tan say duaran anak ton bibii. Inmaligwas ed espiritual so duaran ananak to ya anggad nampabautismo ira, sikato balet et agnampabautismo. Nen ginmapoy guerra, walay sakey a pamilyan Tasi nen Jehova ya angawit ed si Natalia diad mas safe ya lugar. Impanayam dad sakey ya Kingdom Hall diad Ivano-Frankivsk.
Oniay imbaga nen Natalia: “Kayari na makapataktakot iran insabog na bomba, singa agko la amtay onimis. Balet impanengneng na agagi ed siak so tuan panangaro. Agko inilaloan iman ya impampaga ra ed saray pankaukolan ko. Kanian abilay so panangarok ed si Jehova. Nambasa ak lan nambasa na Biblia, insan walay sister ya angiyopresi ed siak na panag-aral na Biblia ya usaren so libron Panliketan so Bilay ya Anggapoy Anggaan! Regalo nen Jehova ed siak iman ya sister.” Onia ni imbaga nen Natalia: “Natan et malikeliket ak ta abautismoan ak la bilang sakey ya Tasi nen Jehova. Labay kon unoren imay sankaimportantian a ganggan ya aroen koy Jehova a Dios ko diad ‘interon pusok tan interon kamarerwak tan interon nonot ko.’”—Mateo 22:37.
Si Olia, diad Poland, ya walay sankabembenan ton akasulatan na tema na kombension: Anap Moy Kareenan!
Si Olia ya tagad Cherkasy et agbautismadon manangipalapag la nen ginmapoy guerra. Nen Marso 6, tinmakas ira paonlad Poland kaibay anak tan apo to. Imbaga to: “Sinmabi kami diman ya say awit mi labat et saray emergency bag mi, balet inasikaso kamin talo na saray agagik ed espiritual. Lapud satan et akombinse ak ya nankakasakey so organisasyon nen Jehova tan igigiya itan na espiritu to. Nen naeksperiensyak iratan ya amin, mas determinado ak lan idedika so bilay ko ed si Jehova. Tinulongan to ak legan na sankairapan ya panaon ed bilay ko, tan natan et labay koy manlingkor ed sikato tan ipanengneng koy pisasalamat kod sikato.”
Si Yulia ya tagad Donetsk Region et 18 so edad to. Binmaleg ed pamilyan Tasi balet ag-abautismoan. Inistorya toy naeksperiensya to nen kakkagapoy guerra. Inkuan to: “Akarukol ak ed saman diad flooring, inisip ko ya anggan anton oras et nayarin ompatey ak. Aderal ya maong so interon lugar ya panaayaman mi, pero akaligtas kamin pamilya. Diad sarayan amin ya naeksperiensya mi tan diad impanpikasik tan impandalepdep ko ed saray kualidad nen Jehova, mas inmapit ak ed sikato tan agak la nan-alangan no kasin idedikak so bilay kod sikato. Inebatan nen Jehova iray pikakasik pian ipalikna to ya maap-apit ed siak. Dati kabat ko labat so Dios, balet natan et inarok la.” Abautismoan si Yulia nen Hulyo 23.
Si David, 11 so taon to, antis ya nabautismoan diad Germany
Nen ginmapoy guerra, si David ya mantaon na 11 et tinmakas ed Germany kaibay pamilya to. Manlapu la nen siamera so taon to, agbautismadon manangipalapag la. Natan et labalabay to lan aboten iray goal tod espiritual. Imbaga to: “Nandesisyon ak ya manpabautismo lapud inarok si Jehova tan labay koy magmaliw ya kaaro to. Legan na bautismok, akaakis ak ed liket ta kaiba ak la natan ed maliket ya pamilya nen Jehova. Labalabay kon ibagad arum so tungkol ed si Jehova tan saray gagala to parad totoo, kanian say onsublay ya goal ko et magmaliw ya payunir. Labay ko met ya lingkoran iray agagi diad kongregasyon, tan no baleg ak la, komon ta magmaliw ak ya ministeryal a lingkor. Pero say talagan goal ko et manlingkor ed Bethel. Abayag ko la yan papangarapen manlapu la nen binmisita kamid branch office diad Lviv nen 2018.”
Si Olena ya tagad Kyiv et nagmaliw ya agbautismadon manangipalapag nen 2011. Insan samploran taon ya nagmaliw ya inaktibo. Balet nen 2020, pinasyar na saray elder na kongregasyon tan inikdan day brosyur ya Pawil Ka Lad si Jehova. Imbaga to: “Nampaiyaral ak lamet na Biblia tan ginapoan ko lamet so miaral. Balet walay panaon ya akatunda ak lamet. Legan na guerra, inebatan nen Jehova iray pikakasik, tan a-realize ko ya prinotektaan ak nen Jehova, tan impanengneng toy panangaro tod siak, tan inikdan to ak na kareenan. Tinmakas ak paonlad Romania tan nalmok iray Tasi. Singa ak inulesan nen Jehova lapud panangaro tan panangasikaso na agagi.” Abautismoan si Olena nen Hulyo 24. Imbaga to: “Misatsalamat ak ed si Jehova ta inanosan to ak. Amtak la natan ya ‘walay biskeg kon arapen so amin a bengatla lapud samay mangiiter ed siak na pakayari.’”—Filipos 4:13.
Nia ray bilang ya inreport anggad Agosto 2, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet nayarin mas atagey ni so aktual ya bilang, lapud mair-irap ya pansiansiaen so komunikasyon ed amin ya lugar diad bansa.
Say Epekto ed Saray Agagi Tayo
43 ya manangipalapag so inatey
97 ya manangipalapag so asugatan
22,568 a manangipalapag so tinmaynan ed kaabungan da tan linmad mas safe iran lugar
586 ya abung so agaygay
613 ya abung so aderal ya maong
1,632 ya abung so medyo aderal
5 ya Kingdom Hall so aderal
10 ya Kingdom Hall so aderal ya maong
37 ya Kingdom Hall so medyo aderal
Say Pangiiter na Relief
27 ya Disaster Relief Committee (DRC) so onkikiwas ed Ukraine
53,836 ya manangipalapag so direktan atulongan na saray DRC pian makaanap na mas safe ya napanayaman
24,867 ya manangipalapag so linmad arum ya bansa tan tutulongan ira na saray agagi diman