Diad saray lugar ya kawalaan na bakbakan ya singa diad Mariupol, anggapoy kuryente odino heating, tan apultot so komunikasyon ed telepono tan Internet. Aderal iray bintana na dakdakel ya abung. Nanaupot met lay suplay na naakan tan danum. Masulok ya 2,500 ya agagi tayo so wala nid Mariupol ta ag-ira makaalis. Diad arum ya syudad, singa diad Bucha, Chernihiv, Hostomel, Irpin, Kyiv, tan Sumy, nilukasan iray “corridor” kanian akapan-evacuate so arum ya totoo. Lapud satan, dakel ed saray agagi tayo so akaonla ed mas safe iran lugar.

Nan-evacuate so sakey ya 36 años ya elder ya payunir, ya tagad Hostomel, kaibay asawa to tan saray atateng to. Inistorya toy agawa ed sikara nen akasabi lad syudad da so guerra:

“Mantikyab iray helicopter diad petek na abung mi. Anggan iner wala ray luluganan na saray sundalo, agew man o labi. Nilooban na saray sundalo so abung mi legan kamin walad basement. Walay sakey ya kaiba dan nampauran na bala ed basement mi. Nala na bala so emergency bag nen nanay ko balet agkami met asakitan. Manga talora odino apatiran oras ya agkami ginmalagalaw tan agkami nampalikas legan min narerengel iray onsasabog ya bomba tan paltogan diad paway. . . . Kaimbuasan to legan min walad luluganan, biglan walay agawan paltogan ya asingger ed sikami. Wala ray tangki diad karsada . . . Delikadon maong, pero mas delikado no agkami inmalis diman.

“Anguma-uman so bilay mi lapud sarayan nagagawa. Naaralan min iyaplika so dakdakel ya prinsipyo na Biblia. Singa bilang, agmi dapat panaburidoan no antoy kaukolan mi parad nabuas, kaukolan mi mankontento ed no antoy walad sikami, tan manmatalek ed si Jehova diad mair-irap iran situasyon.”

Amta tayo ya amta na Dios tayon si Jehova so amin ya mair-irap ya dadalanen na saray agagi tayod Ukraine. Seguradon tuloytuloy to ran tulongan.—2 Pedro 2:9.

Nia ray bilang ya inreport anggad Marso 10, 2022 manlapud Ukraine:

• 2 ya manangipalapag so inatey

• 8 ya manangipalapag so asugatan

• 25,407 ya manangipalapag so tinmaynan ed kaabungan da tan linmad mas safe iran lugar diad Ukraine lanlamang

• 25 ya abung so agaygay

• 59 ya abung so aderal ya maong

• 222 ya abung so medyo aderal

• 7 ya Kingdom Hall so aderal

• 27 ya Disaster Relief Committee (DRC) so onkikiwas ed Ukraine

• 10,566 ya manangipalapag so direktan atulongan na saray DRC pian makaanap na mas safe ya napanayaman

• 9,635 ya manangipalapag so linmad arum ya bansa tan tutulongan ira na saray agagi diman