Makapaermen ta naaaruman so bilang na saray agagi tayon inatey lapud tuloytuloy nin guerra ed Ukraine. Ami-amin et 28 lay naandid bilay ya Tasi nen Jehova.

Base ed saray internasyonal ya balita, grabe so agawan bakbakan diad saray baley ya asingger ed Kyiv nen kagapo na guerra. Manga 4,900 ya manangipalapag so manaayam ed satan ya rehyon, pero masulok ya 3,500 lay akaalis ed mas safe iran lugar.

Nanengneng ed sarayay wadian eksperiensya ya apansiansia na saray agagi tayo diman so mabiskeg ya pananisia da anggano mair-irap iray subok ya dinalan da.

Si Oleksandr ya sakey ya elder ed baley na Makariv et wala lad mas safe ya lugar diad sentro na Ukraine. Balet aburido ta agto nakontak so apatiran kagrupo to, kanian pinmawil ed kawalaan na bakbakan pian anapen ira. Imbaga to: “Amtak ya sankaimportantian ed si Jehova iray mandadayew ed sikato. . . . Nen kasabik ed sular na sakey ed saray manangipalapag, anengneng kon asabogan itan na saray bomba. Akakapot so puerta na basement na abung da tan anggapoy oneebat no tatawagen ko ra. Kanian ataktakot ak ed saman.” Pinilit nen Oleksandr ya lukasan so puerta na basement tan anengneng to diman so grupo na totoo ya amin ira et akanengneng ed sikato. Nalmo to ray manangipalapag, pati saray aliwan Tasin kakaabay da ya kaiba ran onaamot.

Impaliwawa nen Yaroslav, sakey ed saray manangipalapag ya wadman ed basement, ya waloran agew la ran onaamot diman. Oniay inistorya to: “Pigaran biskwit labat tan sakey bason danum kada agew so kanen tan inumen na kada too. Balet babasaen mi Biblia tan saray publikasyon tayo, manpipikasi kami, tan papasesegen mi sakey tan sakey. Nen arengel kon tatawagen nen Oleksandr so ngaran ko, say amtak sinmabi iray sundalo pian alaen ak. Say amtak ompatey ak la. . . . [Balet say agawa,] inliktar to kamin amin. Misalsalamat kami ed si Jehova ta inikdan to kami na maar-aron espiritual ya pamilya ya mangipipikasi ed sikami tan akaparaan iran mangirisgay bilay da pian nisalba kami.”

Nandesisyon met si Pylyp tan sakey nin brother ya iyawitan na naakan iray agagin walad baley na Borodianka. Legan ya manda-drive paonlad satan ya baley nen Marso 17, inala na saray sundalo so luluganan nen Pylyp tan saray naakan ya awit da. Insan inaresto na saray sundalo irayan duaran brother, pinosasan da ra tan pinerengan da ra, insan da ra inawit ed melag ya kuarto ed sakey ya basement ya walay pitora nin lalaki. Kayari duay agew, inyalis da rad sakey ya kulongan tan kasabi labi binugbog ira na saray guardia. Kuan nen Pylyp: “Agko amta no kasin nasarag ko iman. Impikasik ya makapanmatoor ak komon.”

Aminsan legan dan bubugbogen si Pylyp, inkasil toy pikakasi to parad saray maedad lan sister ya anggapoy naakan da, impikasi to met ya komon ta mansiansian safe iray kapamilya to, tan akisalamatan toy Jehova ed dakel ya taon ya maliket ya impanlingkor to. Impawil na guardia si Pylyp ed kulongan to tan diman to intuloy ya impikasi ya komon ta natalosan na saray sundalo ya aliwa ran mauges. Pinulongan na duaran brother iray guardia. Diad loob na duay agew, apulongan da ray guardian mansasalat ya manbabantay ed sikara. Ontan met, angipanengneng na interes ed mensahe na Biblia so sakey ya lakin kaiba ran akapriso. Akisalamatan to irayan duaran brother. Nen Marso 27, nibulos so duaran brother pati samay lakin angipanengneng na interes.

Si Svitlana, sakey ya single sister ya tagad Bucha et agmakaalis ed kawalaan na bakbakan legay duay simba. Oniay imbaga to: “Natan ko mas atalosan so kareenan ya iiter nen Jehova. Agto labay ya ibagan no walad sikatayo so kareenan na Dios et amta tayo lan amin so gawaen tayo. Noagta, no anggapo lan talagay nagawaan tayod situasyon tayo, mandedepende tayo lad si Jehova.”

Legan ya manbiabiahe si Svitlana paonlad mas safe ya lugar, pinulongan toy sakey ya bii tan say kaanakan to. Akasabi ran amin ed mas safe ya lugar tan inmabet ed sikara so sakey ya pamilyan Tasi. Pinaugip na sayan pamilya si Svitlana ed abung da, pati samay bii tan say kaanakan to. Kaimbuasan to, imbaga na samay bii ya labay toy onatendi ed aral na kongregasyon tan akikerew met na Biblia tan saray literatura tayo. Anggad natan et wala ni kontak nen Svitlana ed samay bii.

Nia ray bilang ya inreport anggad Abril 12, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet, nayarin mas atagey ni so aktual ya bilang lapud mair-irap ya pansiansiaen so komunikasyon ed amin ya lugar diad bansa.

• 28 ya manangipalapag so inatey

• 48 ya manangipalapag so asugatan

• 40,778 ya manangipalapag so tinmaynan ed kaabungan da tan linmad mas safe iran lugar

• 278 ya abung so agaygay

• 268 ya abung so aderal ya maong

• 746 ya abung so medyo aderal

• 1 ya Kingdom Hall so aderal

• 9 ya Kingdom Hall so aderal ya maong

• 26 ya Kingdom Hall so medyo aderal

• 27 ya Disaster Relief Committee (DRC) so onkikiwas ed Ukraine

• 41,974 ya manangipalapag so direktan atulongan na saray DRC pian makaanap na mas safe ya napanayaman

• 18,097 ya manangipalapag so linmad arum ya bansa tan tutulongan ira na saray agagi diman