Maliket min ipaamta ya benendisyonan nen Jehova iray totoo to ed Ukraine kanian naatendian na saray agagi tayod interon bansa so Memoryal na Impatey nen Kristo. Inusar so pigaran Kingdom Hall ed western Ukraine pian panselebraan na Memoryal na saray agagi tayon tinaynan day abung da tan inmalis diman. Inkondukta na saray brother so Memoryal ed angkelag ya grupo, insan inkonekta da iramay agmakaalis ed abung da panamegley na videoconferencing.

Diad samay agew na Memoryal, sanagew ya ontatanol iray sirena ya mangipapasakbay ed saray panagbomba diad maslak ya parte na bansa. Nen binmilunget la, tinmunda la ray sirena. “Ipipikasi mi ya agkomon nadisturbo so Memoryal lapud saray panagbomba,” so imbaga nen Sherhiy ya tagad Druzhkivka, Donetsk Region. “Antis ya onggapoy Memoryal, tinmunda la ray pambobomba tan anggapo lay tinmanol ya sirena.”

Walay grupo na saray maedad la tan mansasakit ya manangipalapag diad Nemishaeve, asingger ed Kyiv, ya masulok a sakey bulan la ran agmakakapiaral. Ipipikasi dan makaatendi ra komon ed Memoryal. Tinulongan ira nen Vitaliy, sakey ya elder, pian naselebraan day Memoryal. “Anggapoy kuryente,” kuan to, “kanian nan-Memoryal kami ya aka-flashlight. Anggapoy heater. Anggapoy musika kanian nantogtog na violin may anakon bii pian makakansion kami.”

Oniay inistorya nen Oleksandr, sakey ya elder ya asingger ed kawalaan na bakbakan so panaayaman to: “Legan na kampanya ed panangimbita parad Memoryal, agkami makapansulat ed saray totood teritorya na kongregasyon mi lapud abomba tan ataynan la ray kaabungan. Kanian inimbitaan mi ray kabat mi, saray akaiba mid basement, tan saray akaiba min nan-evacuate. Dakel so akabat mi ya datin ag-ondedengel ed saray Tasi. Dakel ed sikara so akaiba mid Memoryal.”

Agni akompleto so report na amin ya kongregasyon ed Ukraine, pero iilaloan tayo ya masulok ya 210,000 so inmatendi ed Memoryal.

Oniay imbaga na sakey ya brother ed Ukraine nipaakar ed sayan Memoryal: “No panon ya ipapaseguro na lighthouse ed saray marino ya asingger la rad sakbit, ipapaseguro met ed siak na Memoryal ya asingsingger lan onsabi so agew nen Jehova. Mas binmiskeg so kombiksion ko lapud Memoryal ed sayan taon.”

Nia ray bilang ya inreport anggad Abril 21, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet, nayarin mas atagey ni so aktual ya bilang lapud mair-irap ya pansiansiaen so komunikasyon ed amin ya lugar diad bansa.

• 35 ya manangipalapag so inatey

• 60 ya manangipalapag so asugatan

• 43,792 ya manangipalapag so tinmaynan ed kaabungan da tan linmad mas safe iran lugar

• 374 ya abung so agaygay

• 347 ya abung so aderal ya maong

• 874 ya abung so medyo aderal

• 1 ya Kingdom Hall so aderal

• 10 ya Kingdom Hall so aderal ya maong

• 27 ya Kingdom Hall so medyo aderal

• 27 ya Disaster Relief Committee (DRC) so onkikiwas ed Ukraine

• 44,971 ya manangipalapag so direktan atulongan na saray DRC pian makaanap na mas safe ya napanayaman

• 19,961 ya manangipalapag so linmad arum ya bansa tan tutulongan ira na saray agagi diman