Nen Mayo 25 tan 26, 2019, say “Manpabiskeg Ka!” a sirkiton asemblea ed lenguahen Lingala tan Tshiluba et agawa diad Lóvua refugee camp. Sayan kampo et 1,022 kilometro so kaarawi to ed Luanda, say capital na Angola. Nen agawa so asemblea, walay 177 a manangipalapag tan saray pamilya da ya manaayam ed Lóvua camp. Balet manga 380 so inmatendi ed programa diad lenguahen Lingala tan 3 so abautismoan, tan 630 so inmatendi ed programa diad lenguahen Tshiluba tan 6 so abautismoan.

Maslak ya agagi et inmalis paonlad Lóvua lapud magulon situasyon ed Democratic Republic of the Congo. Saray agagi ed Lóvua et agmakaatendi ed saray espiritual a pantitipon ed arum ya syudad lapud agnaabuloyan iray walad kampo ya ombiahe. Kanian inyuksoy na branch iray asemblea diad loob na kampo tan angipaalagey ira na duaran temporaryo ya Kingdom Hall. Apatiran kongregasyon so manguusar ed sarayan Kingdom Hall​—taloran Tshiluba tan sakey ya Lingala.

Nen Mayo 24, 2019, say manangasikaso na sirkito tan say representative na branch et nambiahe paonlad kampo na Lóvua pian ontulong ya i-set up iray gamit parad sound tan stage. Anggaman mair-irap so situasyon na saray refugee, siansian angiter ira na saray tarpaulin, poste, lubir, pasak, tan arum nin materyales ya kaukolan.

Kayari na programa, oniay imbaga nen Honoré Lontongo, ministeryal a lingkor ed sakey ed saray kongregasyon diad refugee camp ya mansasalitay Tshiluba: “Lapud saray inyuksoy ya asemblea diad loob na refugee camp anggano mair-irap so situasyon, aliklikna mi so panangaro nen Jehova aliwa labat ya bilang grupo noagta bilang indibidual. Malikeliket ak!”

Itultuloy tayon ipikasi iray agagi ya tinaynan day lugar da lapud gulo ya nagagawa ed bansa ra. Amta tayo ya tuloytuloy iran taryaan nen Jehova na espiritual a naakan tan suportaan to ira inerman so kawalaan da.​—Roma 8:38, 39.