Manlapud Hulyo 26 anggad 28, 2019, saray Tasi nen Jehova ed Azerbaijan et nankombension ed Darnagul Ceremony House diad syudad na Baku. Diad sayan taon, wala ray agnalinglingwanan ya internasyonal a kombension, tan agmet nalinglingwanan so regional a kombension diad Baku. Aman la so sankabalegan ya pantitipon ya agawa ed Azerbaijan, tan satan so unonan pankanawnawa ya saniba ed sakey a kombension iray kongregasyon ya Azerbaijani tan Russian diad interon bansa.

Anggaman say manangipalapag labat ed Azerbaijan et manga 1,500, say inmatendi ed kombension et 1,938. Walay 33 ya abautismoan. Naabuloyan si Brother Mark Sanderson ya makaloob ed bansa pian ipaliwawa so pigaran parte ed kombension. Aman so sankaunaan ya walay membro na Mananguley ya Ulop ya binmisita ed kombension diad Azerbaijan. Misalsalamat tayod saray walad autoridad lapud inmabuloy irad satan ya kerew tayo.

Baleg ya pantasi so pankakasakey na saray agagi tayo. Legan na kombension, naobserbaan na administrator na venue ya saray Tasi et mareen, maar-aro, tan maomaong ira tan talagan gagawaen da no antoy ipupulong da.

Anggaman siansian naeeksperiensya na Saray Tasi nen Jehova ed Azerbaijan iray nanduruman panamasegsegang lapud pananisia da, tuloytuloy ya iikdan na gobierno iray agagi tayo na kawayangan pian makapandayew irad si Jehova. Nen Nobyembre 2018, inikdan na Azerbaijan iray Tasi nen Jehova na legal a kanepegan pian nirehistro ira ed Baku. Lapud satan, awalaan iray agagi tayo na malet ya legal a basiyan pian bulos iran makapandayew ed si Jehova ed satan ya syudad.

Mililiket tayod saray agagi tayo ed Azerbaijan lapud sarayan balibalin nagagawa, kaiba lay agano nin agnalinglingwanan ya agawa ed history na Saray Tasi nen Jehova diad lugar da. Ipikasi tayo ed si Jehova ya tuloytuloy ton bendisyonan so pansasagpot tayo ya ‘makaala na legal a kanepegan a mangipulong na maong a balita’ diad interon Azerbaijan tan ed interon mundo.​—Filipos 1:7.