Say Branch Committee na Brazil et nambuo na 18 ya Disaster Relief Committee (DRC) pian tulongan iray publisher ya naiirapan ed pinansyal lapud coronavirus pandemic. Diad interon bansa, tutulongan na saray DRC so manga 12,000 a kongregasyon kaiba la ray agagi tayon manaayam diad ararawin lugar na Amazon River. Diad kaplesan, 131 ya pamilya diad Amazon so akaawat la na tulong.

Say DRC diad Manaus, say kapital na syudad ya Amazonas, et angiparaan na relief goods a parad sakey bulan ya suplay. Kaiba ed saratan iray naakan, singa say beans, arina, belas, tan gatas. Wala met iray sabon, tissue, toothbrush, tan toothpaste. Impawit iratan na saray agagi tayo panamegley na barko diad asingger ya daungan ed Manacapuru insan imbunog iratan panamegley na baluto diad saray ararawin pasen, singa say Membeca tan Lago do Castanho.

Oniay imbaga nen Sister Marinelma, ya manaayam ed rehyon na Lago do Castanho, kayari ton naawat iray suplay ya naakan: “Unona, misalsalamat ak ed si Aman Jehova ta aasikasoen to kami. Kakkaukolan min maong so tulong ta anggapo lay kuarta min isaliw mi naakan. Sakey ni, misalsalamat ak met ed saray agagi lapud inkamaiter tan panangaro da. Nen lulukasan tan aayosen ko iramay naawat min relief goods, anengneng ak na ana’kon laki ya anem taon to ni labat, kanian sinambot ko ya impaliwawa ed sikato ya inusar nen Aman Jehova iray agagi pian tulongan kami. Imbaga tod siak, ‘Nay, nayarin manpikasi tayo pian misalamat ed si Aman Jehova?’”

Oniay insulat nen Brother Jonas Monteiro, ya manaayam ed syudad na Caapiranga kaibay pamilya to: “Balbaleg ya salamat ed amin ya tulong yo. Lapud sikayo, nalilikna mi panangaro nen Aman Jehova. Talagan pribilehyo so pagmaliw ya kabiangan na sayan sankamundoan ya pamilya.”

Anggan saray agagi ed DRC et apaseseg met. Oniay imbaga nen Isaac Emannuel Ramalho de Oliveira, sakey ya elder ya kaiba ed DRC: “Diad kada agew ya pikikimeyan ko ed DRC, ombibiskeg so pananisiak. Mas baleg so nitutulong ed siak na sayan kimey nen say niiiter kon tulong ed saray agagi.”

Napapabiskeg so pananisia tayo lapud nanenengneng tayon aasikasoen nen Jehova iray lingkor to legan na sayan pandemic, inerman so kawalaan da.​—Salmo 94:14.