Diad kaso na Highwood Congregation of Jehovah’s Witnesses (Judicial Committee) v. Wall, nandesisyon so Korte Suprema na Canada nen Mayo 31, 2018, ya “saray grupo na relihyon et bulos ya mandesisyon no siopa iray nayarin magmaliw ya membro na relihyon da tan manggawa na sarili dan totontonen,” kanian bibidbiren na korte ya anggapoy kanepegan to ya pibabalian so uksoyan nipaakar ed panagdispelosip.

Imbaga na Korte ya say uksoyan na saray Tasi nipaakar ed pangasikasod sakey a seryoson kasalanan “et aliwan panagbusol, noagta pian natulongan so sakey a membro ya ompawil ed Kongregasyon,” kanian nandesisyon itan ya nepeg ya agmibabali iray korte ed ontan iran bengatla ya personal tan walay koneksion tod relihyon.

Diad biang na siameran huis, impaliwawa na Supreme Court Justice ya si Malcolm Rowe iray rason ed satan ya desisyon: “Saray uksoyan tan totontonen na sakey a relihyon et nayarin imbase ed doktrina na relihyon da, ya singa ed sayan situasyon. Saray korte et anggapoy autoridad tan pakayari da ya manggaway desisyon nipaakar ed saray doktrina na relihyon.”

Oniay imbaga nen Philip Brumley, say abogado ya mangirerepresenta ed Saray Tasi nen Jehova: “Diad sayan desisyon, akikasakey so Korte Suprema na Canada ed saray korte na Argentina, Brazil, Hungary, Ireland, Italy, Peru, Poland, tan United States ya mamibidbir ed legal ya kanepegan tayon tumboken so Makasulatan ya uksoyan no siopay kualipikadon magmaliw ya Tasi nen Jehova.”​—1 Corinto 5:11; 2 Juan 9-11.