Diad masulok lan 20 taon, saray Tasi ed Colombia et manggagawa na libren panangiyaral na Biblia ed saray priso. Nen Nobyembre 30, 2018, say Paulo Freire Educational Center et angiter na certificate ed saray Tasi nen Jehova bilang pisasalamat ed gagawaen dan panangiyaral na Biblia ed sakey ya prisoan diad syudad na Valledupar. Diad kaplesan, 50 ya priso ditan so manaaral na Biblia.

Diad interon Colombia, saray Tasi nen Jehova et angorganisa na saray klase diad 65 ya prisoan, tan walay 782 ya iyaaralan da na Biblia ditan. Manlapu nen 1996, wala lay 60 ya nampabautismo.

Si Néver Antonio Cavadía et nampaiyaral na Biblia diad prisoan tan abautismoan nen 1998. Insan nen 2007, sikatoy akapaway la ed prisoan ed Valledupar. Oniay imbaga to ya maabig ya resulta na impanaral toy Biblia: “Prinotektaan ak na saray prinsipyo na Biblia tan akatulong iratan pian amtak no antoy dugan gawaen legan kon walad prisoan. Akatulong met iratan pian umanen koy kabibilay ko tan agak naandian na ilalo.”

Diad interon mundo, mansasagpot tayo pian napulongan iray walad prisoan ta amta tayo ya say linawa nen Jehova et “niliktar so amin a klase na totoo tan nawalaan ira na suston kakabatan ed katuaan.”​—1 Timoteo 2:4.