Manlapu lad bandad sampot na Abril 2021, wala ray nagagawan gulo diad Colombia. Anggapo met ed saray Tasi nen Jehova so inatey odino asugatan. Balet diad arum ya lugar, mair-irap so makasaliw na naakan tan gasolina. Aanosan na saray agagi tayo itan ya mairap a situasyon, ontan met ed kairapan ya resulta na COVID-19 pandemic.

Lapud satan, nambuo so Colombia Branch Committee na limaran Disaster Relief Committees (DRC). Legan dan itatarya iray praktikal ya tulong, tutumboken da iray COVID-19 safety protocols. Saray agagi ed satan ya lugar et mantutulongan pian makaawat na naakan so amin ya agagi. Itatarya met na saray elder ed kongregasyon tan saray manangasikaso na sirkito so espiritual ya pankaukolan na saray agagi.

Oniay imbaga nen Brother Almond Winklaar ya tinmulong ed sakey ed saray DRC: “Mair-irap so situasyon mi. Balet misalsalamat ak ed si Aman Jehova lapud onkikiwas ya tampol pian asikasoen iray nanairapan ya lingkor to.”

Akaawat na naakan so 18 ya manangipalapag ed La Loma Arena Congregation tan say pamilya ra. Oniay imbaga na sanasawan payunir ed satan ya kongregasyon: “Malikeliket kamin maong nen naawat mi ray tulong manlapud Disaster Relief Committee. Impasen mi yan ebat ed saray pikakasi mi. Misalsalamat kami ed espiritual ya pamilya mi ya mangiiter ed saray kaukolan mi tan misalsalamat kami met ed si Aman Jehova ya mamapabiskeg ed sikami pian makapansungdo.”

Talagan mandinayew iray empleyado ed supermarket ya angaliwan na saray DRC na dakel ya suplay lapud gagawaen dan itutulong. Oniay imbaga na sakey ya mantratrabaho ed samay supermarket: “Amtak ya saray Tasi nen Jehova et oonlad saray kaabungan tayo pian ipasabi so mensahe na Salitay Dios, balet sayan balibalin gagawaen da ya itutulong ed saray mankaukolan et talagan pandinayewan ko.”

Diad sarayan mairap ya situasyon, pansiasiansiaen na saray agagi tayo so espiritual ya rotina da. Amta tayo ya tuloytuloy ya itatarya nen Aman Jehova so pankaukolan na saray agagi tayo diad materyal tan espiritual legan iran mansiasiansia ya “agkabiangay mundo.”—Juan 17:16.