Likud ed coronavirus pandemic, aanosan na saray agagi tayo ed arum ya lugar na Democratic Republic of the Congo tan Republic of the Congo iray epekto na delap tan tuloytuloy ya panlalaban. Inyuksoy na Congo (Kinshasa) branch office, say mangidadaulo ed panagpulong a kimey diad sarayan duaran bansa, so pangiter na materyal tan espiritual ya tulong ed saray agagi. Natan, wala lay abuo na branch office ya 57 ya Disaster Relief Committee (DRC) diad interon sakop to pian ontulong ed saray agagin mankaukolan. Diad kaplesan ya relief effort, masulok ya 90,000 ya agagi so naikdan la na saray suplay na naakan.

Lapud tuloytuloy tan maksil ya uran, adelap iray probinsya diad bandad bukig na Democratic Republic of the Congo nen Abril 16 tan 17, 2020, kanian 139 ya agagi tayo so tinmaynan ed panaayaman da. Pinatuloy ira ed abung na agagi tayo. Saray DRC ed satan ya lugar et mantutulongan pian makalmo na temporaryo tan permanentin napanayaman na saramay apektado na delap.

Malikeliket ya tinmulong iray agagi tayo ed gagawaen ya relief effort na saray DRC. Diad sakey ya lugar, nandonasyon iray agagi tayo na 700 kilo na ponti, 400 kilo na mais, tan 220 kilo na kahoy tan cassava leaves.

Sakey ni, pinatuloy na 60 ya agagi diad Some 26 Km Congregation so 50 ed saray agagi tayo ya tinmaynan ed lugar ya nagagawa so panlalaban. Innabang na agagi iray naakan da diad sarayan agagin mankaukolan ya anggad naawat da so tulong na DRC.

Indeskribe na sakey ya ulo na pamilya diad Brazzaville, say kapital na Republic of the Congo, so eksperiensya to nen akaawat na relief: “Bigla labat ya manguman so bilay. Dati, marakep so trabahok tan maong so sueldok, wala met so sideline nen asawak, kanian anggapoy problema mid pinansyal tan ed pankaukolan mi. Balet nen ginmapo so pandemic, naupot so amin ya tipon mi. Pero agnaandi so panagmatalek mid si Jehova. Nen pantotongtongan mi no antoy gawaen mi no anggapo lay kanen mi, kinmiwas a tampol si Jehova pian tulongan kami.”

Onia met so imbaga nen sister Mbuyi Ester, sakey a balo diad syudad na Kinshasa: “Kakkapatey nen asawak nen imbeneg labat a bulan, kanian talagan mankakkaukolan ak. Anggapoy trabahok tan kaukolan kon legpeten so taloran angkelag nin ananak ko. Anggapoy pakasarag mi ya makapawala na naakan mi diad loob na dakel ya agew. Salamat, Jehova!”

Ipikasi tayo ya tuloytuloy komon ya asikasoen nen Jehova iray agagi tayo tan bendisyon to so relief work tayo. Labalabay tayo met lan onsabi so panaon ya panliketan la na amin a totoo so dakdakel ya naakan diad dalin.​—Salmo 72:16.