Nen Hulyo 25, 2019, nanlukas so balon Bible museum diad branch office na Saray Tasi nen Jehova diad France, ya walad baley na Louviers, manga 100 kilometro so kaarawi to ed Paris. Say tema na museum et “Say Ngaran na Dios tan say Biblia ed French.”

Nanengneng ed museum iray mataltalag tan importantin Biblia diad lenguahen French. Say sakey ed saray sankaimportantian et say orihinal ya kopya na Olivétan ya Biblia ed French nen 1535, a tatawagen met ya “La Bible de Serrières.” Say Olivétan so sankaunaan ya kompleton patalos na Protestante ed Biblia diad lenguahen French. Satan met so sankaunaan ya French a Biblia ya impatalos manlapud saray orihinal ya lenguahe. Baleg so epekto na satan ed saray sinmublay ya patalos na Biblia, pati diad English ya 1537 Matthew’s Bible, diad English ya Geneva Bible, tan diad French ya Geneva Bible. Say arum nin mataltalag ya orihinal a Biblia ya aka-display diman et say French ya komatlon edisyon na Jacques Lefèvre d’Étaples ya Biblia nen 1541, say Latin Pentateuch nen 1541 tan say Latin a Biblia ya in-produce na manag-imprinta ed Paris ya si Robert Estienne nen 1545, tan say French a Biblia ya in-produce na manag-imprinta ed Lyon ya si Jean de Tournes nen 1557.

Nabasa ed Olivétan, ed Latin Pentateuch tan Latin a Biblia nen Estienne, tan ed Jean de Tournes a Biblia so ngaran na Dios ya Jehova. Saratan ya Biblia et indonasyon ed Museum Department diad World Headquarters na Saray Tasi nen Jehova diad Warwick, New York. Inyarum iratan ed saray dati lan koleksion na saray Biblia diad branch office na France.

Oniay inkomento nen Enrique Ford ya kabiangan na Museum Department: “Nanengneng ed sayan balon Bible museum ed opisina tayo diad France so makapadinayew ya istorya na Biblia ed lenguahen French. Ipapaimano to met so agnapanduaruwaan ya pakanengnengan na ngaran na Dios, ya Jehova, diad Biblia. Tuloytuloy tayo nin mananap na saray mataltalag tan makapainteres iran Biblia ya nayari tayon i-display ed saray museum tayo ed interon mundo.”