Walomplon taon lay apalabas, inawit na baloto na prisoan si Minos Kokkinakis ed Amorgós, sakey ya isla na Greece diad Aegean Sea, tan 13 bulan diman ya nansiansia. Senentensiaan na korte na Greece si Brother Kokkinakis lapud ibabaga ran sinumlang toy balon ley ya mangibabawal ed pangomberte ed arum, balet ta agda inikdan na pankanawnawan idepensa so sarili to. Satan ya ley et impaakseb na Griegon diktador ya si Ioannis Metaxas, tan si Brother Kokkinakis so sankaunaan ed saray 19,147 ya Tasi nen Jehova ya inaresto manlapud 1938 anggad 1992. Legan na satan ya masulok a 50 taon, makpel ya impulong na nilasus ya Griegon Tasi so maong a balita anggano pinairap, inaresto, tan impriso da ra.

Manga 30 so edad nen Brother Kokkinakis nen ginmapo so 50 taon ya impilaban to pian magmaliw ya bulos ed panginabang tod pananisia to. Sikatoy masulok ya 60 beses ya naaresto tan masulok ya anem taon ed saray prisoan tan ed saray isla ya pangaawitan ed saray priso, ya ditan et akaiba to iray arum nin Tasi tan inanosan da iray makapasinagem ya kipapasen. Nen 77 lay edad to, sikatoy inaresto ed sampot ya pankanawnawa tan sikatoy inmapela ed korte. Balet, ag-analo kanian insegep toy kaso to anggad Korte Suprema na Greece. Insan inmapela ed European Court of Human Rights (ECHR) si Brother Kokkinakis lapud agbinidbir na anggan dinan ya korte na Greece so kanepegan to ya bulos a mandayew ed Dios. Nen 1993, nen 84 años la si Minos Kokkinakis, analo ya siansia so kaso to, tan satan so sankaunaan ya pankanawnawan indeklara na ECHR ya nankasalanan so sakey ya bansa lapud agto inyabuloy ya bulos a mandayew iray totoon walad sakop to. * Say taon 2018 so koma-25 ya anibersaryo na satan ya agnalingwanan ya desisyon na korte. Imbaga na sakey ya propesor na public international law ya say kaso ya Kokkinakis “so sankabetbetan lan nabitla ya impangukom na European Court of Human Rights nipaakar ed kanepegan a manpili na relihyon o pananisia.”

Say desisyon ed kaso ya Kokkinakis et angiletneg na pangaligan ya siansia nin mausar ed sayan panaon ya sasalien na saray makapanyarin gobierno, singa say Russia, ya ekalan na kanepegan iray agagi tayo ya bulos a mandayew.

Say pananisia tan inkaseet ed ministeryo nen Brother Kokkinakis et sakey ya marakdakep ya alimbawa ed saray agagi tayon napapasegsegang ed panagpulong da. Say katooran to et angiter na mabiskeg ya pantasi tan makakatulong ni itan ed saray agagi tayo natan.​—Roma 1:8.