Lapud COVID-19 pandemic, wala ray linmesan problema na 11 ya remote translation office (RTO) diad India, ya mangipapatalos na saray publikasyon tayo ed 36 a lenguahe. Diad tulong nen Jehova, nasosolusyonan iratan na saray translation team tan tuloytuloy so pankikimey da.

Pian nipatalos iray literatura tayo, saray translator et kaukolan ya saniiban mantrabaho. Balet, legan ya onkakayat so COVID-19, nan-lockdown so India kanian agmakapaniiba iray translator. Ontan met, anggan saray mankikimey parad audio tan video recording et agmakapanrekord ed saray RTO.

Diad saray RTO, saray translator et siansian makakapankimey panamegley na videoconferencing tan remote recording. Lapud sarayan paraan, saray translator et makakaawat na tulong manlapud saray agagi tayo ed arum ya bansa, singa say Bangladesh tan United States.

Akaisip na balon paraan iray agagi tayo pian makagawa ra na saray video ed sign language legan dan tutumboken so social distancing. Say arum ya translator et ginawa ran studio so kuarto da tan manguusar iray alternatibon kagawaan. Singa bilang, manguusar iray cellphone imbes ya mablin camera, tan kahon imbes ya tripod.

Likud nid saratan, matalek iray translator diad RTO ya tulongan ira nen Aman Jehova pian mansiansia ran positibo tan dakel so nagawaan da legan na sarayan panaon. Nia ray komento na arum ed sikara:

Imbaga nen Brother Jose Francis ya walad Kolkata: “No walay mairap ya situasyon, say nanenengneng na totoo et problema, balet say nanenengneng nen Jehova et solusyon.”

Imbaga nen Sister Bindu Rani Chandan ya nanlapud Bangalore: “No iisipen kon nauusar ak nen Jehova diad sayan mair-irap ya panaon, malikeliket ak anggano wala ray subok.”

Oniay alikna nen Sister Rubina Patel ya tagad Vadodara: “Anggapon balot so makaamper ed si Jehova tan ed organisasyon to​—anggan say coronavirus.”

Misalsalamat tayo ed saray agagi tayon makulikulin mangipapatalos. Matalek tayo ya tutulongan ira na makapanyarin masanton espiritu nen Jehova tan seguroen na satan ya espiritu ya nasumpal so impropesiya nen Jesus: “Sayan maong a balita na Panarian et nipulong ed interon dalin bilang pantasi ed amin a nasyon.”​—Mateo 24:14.