Minilyon ya Tasi nen Jehova tan interesadon totoo so mantitipon no Martes, Abril 7, 2020, pian selebraan so sankaimportantian ya okasyon ed taon, say Memoryal na impatey nen Jesus. Balet diad sayan taon, lapud COVID-19 pandemic, nikadkaduma so panselebra tayo ed saya. Diad interon mundo, dakel so mantitipon panamegley na videoconference.

Lapud coronavirus pandemic, insebel na saray autoridad diad dakel ya bansa iray angkabaleg ya pantitipon. Kanian dakel ya kongregasyon diad interon mundo so manguusar la na videoconference diad saray sinimban pantitipon da. Usaren met na sarayan kongregasyon so videoconference pian selebraan da so Memoryal. Wala met so in-rekord ya programa ya i-post ed jw.org pian nabantayan na publiko.

Masulok ya 20 milyon ya totoo so inmatendi ed Memoryal nen imbeneg a taon. Iilaloan ya minilyon so onatendi ed Memoryal panamegley na videoconference, ikonekta ed telepono, odino pambantay na rekording diad jw.org.

Diad dakel a bansa, tuloytuloy nin onkakayat so virus kanian napepeligro so dakel ya totoo. Pian naprotektaan iray agagi, kaukolan ya tumboken a maong iray ganggan na saray autoridad ya anggad naandi la iyan sakit ya mamipeligro ed totoo. Balet mantitiwala tayod si Jehova ya tulongan to itayo, tan determinado tayon tumboken so ganggan nen Jesus ya “itultuloy yon gawaen iya bilang pannodnonot ed siak.”​—Lucas 22:19.