Lapud pandemic, first time ya inusar so video conferencing ed saray Pioneer Service School diad interon mundo legan na 2021 serbisyon taon. Naapresyan maong na saray estudyante iyan espiritual ya probisyon kanian ginawaan day anggaay nayarian da ya makaatendi. Nia ray eksperiensya ya mangipapanengneng ya tinulongan nen Jehova so arum ya payunir pian makaatendi ed klase anggano mairap so situasyon da odino wala ray problema ra.

Si Sister Mieko Yoshinari ya tagad Japan et 30 taon la ya manlilingkor bilang regular payunir. (Nengnengen so litrato diad gapo.) Anggano nanairapan ya mangusar na saray elektronikon gadyet tan makapuy so mata to, talagan determinado ya makaatendi ed virtual pioneer school. Kuanto, “Manpaparaan ak na saray ikomentok, isusulat koy a-research ko ed angkakabaleg ya letra pian mainomay kon nabasa. Pinabiskeg ak nen Aman Jehova panamegley na PSS.”

Si Sister Anita Kariuki ya tagad Thika, sakey ya baley ya asingger ed Nairobi, Kenya et mantratrabaho bilang sakey ya beautician pian nasuportaan toy pampapayunir to. Pian makapan-PSS, kaukolan ton isara so negosyo to na interon simba. Nen unaan, naaaburidon maong si Anita. Balet nanmatalek ya tulongan nen Jehova. Oniay imbaga to: “Basta nampikasi ak ed si Jehova. Impalimak lan amin ed sikato, insan ko intuloy so ministeryok.” Diad samay weekend antis ya onggapoy PSS, magenap so nalmo ton kuarta pian nabayaran toy arum ed saray gastos to. Anggaman kulang ni itan na $30 (U.S.), inmatendi nin siansia ed klase. Kayari na klase na Mierkoles, walay kustomer nen Anita ya tinmawag ed sikato pian manbayar na utang to. Eksakto itan ed samay kaukolan nen Anita pian nabayaran to lan amin iray gastos to!

Say abung da di Sister Laurenth Madrigales ya tagad Yoro, Honduras et adelap tan napnoy pitek ya anggad 3 feet so kaaralem to lapud saramay bagyon Eta tan Iota. Aderal so amin lawarin kayarian na pamilya to. Tan agda napanayaman so abung da. Diad saman et naawat nen Laurenth so imbitasyon ya man-PSS. Eksayted ya maong ta naimbitaan. Pero aburido ta ompan agda nasumpal ya linisay abung da antis ya onggapoy klase. Oniay inistorya nen Laurenth: “Onggagapo kami lan masakbay ed kabuasan tan lablabi kami la nasusumpal. Pigay agew ya ontan so ginawa mi. Agaylay kesaw ko. Singa anggapo lay kasil kon manaral pian makapanparaan ak parad klase. Kanian imbagak ya agko la awaten imay imbitasyon.” Nampikasi ed si Jehova tan imbaga ton maer-ermen ed situasyon to. Pigay agew antis ya onggapoy klase, mankelaw ta imbaga na Disaster Relief Committee ya tulongan da ran manlinis na abung da. Kanian wala lay panaon ton manparaan. Tan lapud satan, akapan-PSS diad abung da.

Si Brother Spencer Stash tan say asawa ton si Alexandra et regular payunir diad Cleveland, Ohio, United States. Antis ya onggapoy PSS, naospital so abalo lan tatay nen Spencer, ya say ngaran to et Robert. Manaalangan so sanasawa no kasin man-PSS ni ra. Pero pinaseseg ira nen Robert ya ituloy day panaral da. Balet makapaermen ta inatey si Robert, duay agew antis ya onggapoy klase. Anggano agaylay ermen da, amay unonan agew labat na klase so agnaatendian nen Spencer tan Alexandra. Lanang iran manpipikasi tan pinabiskeg ira nen Jehova pian makapantultuloy. Imbaga nen Spencer ya maligen so liknaan da ta ginawa da may labay nen tatay to. Onia ni imbaga nen Spencer, “Tatalaranan mi lay panaon ya ibaga mid si tatay ya akapan-PSS kami. Insan mi inabang ed sikato iray naaralan mi. Atulongan kamin maong lapud suporta na saray kaklase tan instruktor mi.”

Si Brother Jung Dae-sik ya tagad South Korea et samploy taon lan manaayam ed nursing home. Akadepende lad wheelchair manlapu la nen na-stroke tan medyo a-aparalyze. Sinali to met so onatendi ed apalabas iran pioneer school. Balet lapud kipapasen na laman to, anggad sakey agew labat so nasarag ton iloob ed klase. Kanian nen naimbitaan ed virtual PSS, agaylay liket to. “Agko napokpokay luak lapud pisasalamat ko ed sayan uksoyan. No anggapoy onia, agak lan balot makapan-PSS,” so kuan to. “Malikeliket ak ta akapibiang ak ed klase.”

Si Brother Eddy El Bayeh tan say asawa ton si Cherise et manaayam ed New South Wales, Australia. “Singano apasakey lay ministeryok,” so kuan nen Cherise. “Singa rotina labat la tan agko amta no panon kon naarumay seseg ko.” Balet akatulong ya maong so PSS ed sikato. “Anengneng ko ray dakdakel ya paraan ya napalaknab koy ministeryok anggano limitadoy kipapasen ko.”

Impaliwawa nen Eddy no panon ya apaseseg ed PSS. “Singa iya balbaleg ya lakap manlapud Soberanon Dios. Singa to ak tatapiken tan ibabaga ton, ‘Ituloy mo labat, kaiba mo ak. Inar-aro ta ka tan sankanonot ta ka.’”

Dakel nin virtual ya klase so akaplano ed sayan taon. Napapaseseg itayon maong ta tuloytuloy ya ibabangat nen Jehova iray totoo to anggano mair-irap lay nagagawa ed mundo. Nanonotan tayod satan imay imbaga nen Job: “Say Dios et nitandoro lapud pakayari to; wala tay managbangat a singa sikato?”—Job 36:22.

Nanengneng ed saray litrato ed leksab iray instruktor tan saray estudyante ed arum ya lugar ya akinabang met ed virtual ya Pioneer Service School.