In-release na saray Tasi nen Jehova so JW Stream–Studio, sakey a balon website ya ginawa pian nai-broadcast ya live iray asemblea ya kaiba so manangasikaso na sirkito. Nen Marso 6 tan 7, 2021, inusar iyan paraan ed 340 ya sirkiton asemblea diad nanduruman lugar ed interon mundo. Masulok ya 500,000 so akabantay ed sarayan programa.

Ag-abayag kagapo na pandemic, inaprobaan na Teaching Committee na Mananguley ya Ulop so Broadcasting Department na world headquarters ya manggawa na website ya ontulong ed saray manangasikaso na sirkito ya man-host na saray sirkiton asemblea diad online. Say gagala ed sayan proyekto et makagawa na sakey ya website ya ontulong pian nabantayan ya live na nilibon totoo so programa.

Nambuo so Broadcasting Department na melag ya grupo na agagi ya mankimey ed sayan proyekto. Legan dan gagawaen iya, wala ray pigaran problema ya kaukolan dan resolbien.

Singa bilang, kaukolan ya mainomay ya usaren so website ta aliwan amin ya agagi et marunong ed computer. Sakey ni, kaukolan ya tuloytuloy iyan onggana anggano makapuy so Internet. Ontan met, nantulongan so Broadcasting Department tan say Computer Department na world headquarters pian napawala so magenap ya computer server. Importante itan ta nilibon totoo so manbabansag ya mangusar ed website.

“Aliwan mainomay balet makapaliket so manggawa na website ya nausar ed pan-host na nilasus iran asemblea ya manbabansag,” so imbaga nen Alex Hernandez ya walad Broadcasting Department. “Walay melag ya grupo na saray programmer ed sayan proyekto, tan dakel ed sikara et first time day manggawa na website parad live iran programa.”

Nen Mayo 2020, asumpal iray unonan desinyo na JW Stream–Studio. Kalabas labat na limaran bulan, nen Oktubre 2020, ginapoan na Broadcasting Department ya salien so website diad tulong na saray manangasikaso na sirkito diad anemiran bansa. Anengneng ed sayan test iray nayarin onlesan problema tan niresolbe iratan antis ya in-release so website. Walay 17 ya agagi diad technical support ya tinmulong legan na unonan impangi-broadcast ed saray programa.

Onia ni imbaga nen Alex: “Kada no walay onlesan problema, ontunda kamin magano tan manpikasi. Insan no nasolusyonan mi, amta mi ya talagan tutulongan kami nen Jehova.”

Dakel so naawat min pisasalamat lapud sayan balon website.

Oniay imbaga nen Brother Jairo Espinosa ya tagad Colombia: “Alikna min apaelet so pankakasakey tayon sanaagi lapud programa na asemblea ya im-broadcast ed JW Stream–Studio tan mas inmapit so liknaan mi ed saray agagi tayo. Ontan met, lapud amta mi ya live so programa, akatulong itan pian lalo kamin manpokus ed saray paliwawa. Agmi labay ya walay napalampas mi—talagan bendisyon itan!”

Oniay imbaga nen Sister Magaly Reymundo ya tagad United States: “Amtak ya pareho labat so naawat ya impormasyon anggano prerecorded so programa, pero nan-enjoy ak ya maong legan kon babantayan ya live iray manpapaliwawa ya kabat ko.”

Manlapu la nen in-release so JW Stream–Studio, nausar la itan ed masulok ya 800 ya sirkiton asemblea. Misalsalamat tayod si Jehova ed impangitarya to na sakey nin uusaren ya makatulong pian ombiskeg so espiritualidad tayo tan mansiansia so pankakasakey tayo.—Salmo 133:1.