Kekerewen na sakey ya asosasyon ya inletneg na saray akaligtas ed Dachau concentration camp, say Lagergemeinschaft Dachau, ya itunda la na saray autoridad na Russia so pamapasegsegang da ed saray Tasi nen Jehova. Kinondena na asosasyon so organisadon pamapasegsegang na Russia ed saray agagi tayo diman. Ginawa da itan panamegley na open letter ya parad si Presidente Vladimir Putin nen Mayo 16, 2021.

“Kada agew et walan walay report na panamasegsegang na gobierno ed saray Tasi nen Jehova,” so nabasa ed sulat. “Lolooban tan guguloen na saray secret agent na Russia, FSB, tan pulis iray kaabungan na saray membro na sayan relihyon. Papairapen tan sasakitan da met iray Tasi nen Jehova. Nasesentensiaan na andukey ya pakapriso iray bibii tan lalaki. Mabetbet ya agnaaaprobaan iray kerew ya bawasan komon iray irap ya naeeksperiensya da ed prisoan odino naikdan ira komon na parole.”

Oniay nabasa ed sampot na sulat: “Kekerewen mi ed sikayo ya iter yo komon ed amin ya manaayam ed Russian Federation so kanepegan dan bulos ya mandayew. Ipangasi yo, itunda yo la iyan ag-inkahustisya!”

Kasabi na Mayo 2021, inmabot lad 61 ya Tasi ed Russia so akapriso lapud pananisia ra. Kaiba ed saraya iray maedad la, singa si Sister Valentina Baranovskaya ya manedad la na 70, ya asentensiaan na duaran taon ya pakapriso. Sikatoy na-stroke nen Hulyo 2020. Ag-inawat na korte so apela to tan say anak to ya si Roman Baranovskiy, ya asentensiaan na anemiran taon ya pakapriso nen Mayo 24, 2021.

Naaapresya tayo irayan imbaga na saray patas ya totoo ya kekerewen dan itunda la so ag-inkahustisya ya naeeksperiensya na saray agagi tayod Russia. Segurado tayo ya iliktar nen Jehova iray totoo to.—Daniel 12:1.