Lapud ikakayat na sakit ya novel coronavirus (COVID-19) diad interon mundo, apektado so minilyon ya Tasi nen Jehova. Anggaman ontan, pansasagpotan dan tumboken iray panangigiya na saray walad autoridad legan dan itutultuloy ya gawaen iray teokratikon kimey da. Diad saray branch territory ya apektadon maong na sayan virus, manguusar iray agagi tayo na balon paraan pian nitultuloy day ministeryo da.

Oniay imbaga na sakey a brother ed Pisa, Italy: “Balibali so resulta na ministeryo mi! Lapud wala labat ed abung so dakel ya totoo, nananap kami nen asawak na saray contact number ed cellphone mi tan inyuksoy mi so manpulong panamegley na videoconference. Dakel so iyaaralan mi na Biblia tan papawilen mi, say arum et balo tan dati lan akatongtong mi, ya sarag min pulongan anggan mabayag, tan balibali iray resulta.”

Diad South Korea, lapud sayan krisis, mabetbet ya uusaren na saray manangipalapag iray feature na website tayon jw.org tan say JW Library app. Singa bilang, ag-inilaloan na sakey ya brother ya makaawat na text manlapud sakey ya datin iyaaralan to na Biblia ya tinmunda lan manaral na Biblia taloy taon lay apalabas. Inamin na saman ya laki ya lapud sayan sakit ya onkakayat natan, apakiwas ya nonoten a maong iray tanda na kaunoran iran agew. Inusar na brother so feature ya “Share Link” diad JW Library app pian mangi-send na saray impormasyon nipaakar ed kaunoran iran agew ed samay datin iyaaralan to panamegley na text. Impaliwawa na brother ya “makapaseseg ya nanengneng ta naliliing so dakel ya totoon nanaugip ed espiritual lapud saray ebidensya na tanda na kaunoran iran agew.”

Papaneknekan na dakel ya report manlapud saray branch diad interon mundo ya talagan papablien na agagi tayo so ministeryo da. Makapaseseg ya nanengneng no panon dan uusaren so “makanan karunongan” pian nitultuloy dan nipulong so maong a balita.​—Miqueas 6:9.