Nen Hunyo 1, 2023, dakel ya pasilidad na Bethel ed interon mundo so inlukas lamet parad pan-tour. Masulok ya taloran taon ya anggapoy tour lapud COVID-19 pandemic. Kanian espisyal iman ya agew parad saray membro na pamilyan Bethel ed interon mundo tan ed saray nilibon nan-tour.

Kasabi na saray man-tour, malikeliket iran in-welcome na saray Bethelite ya de-awit na poster, kinansionan da ra, tan nilakap day sakey tan sakey. Oniay imbaga nen Ellis Bott, ya ginmapon nanlingkor ed world headquarters diad Warwick, New York, legan na pandemic: “Makapaliket ya nanengneng iray Bethelite diad paway na lobby ya de-awit na poster pian i-welcome iray man-tour! Nen naobserbaan ko ya dakel so onaakis lapud liket da, mas aliknak ya talagan espisyal so Bethel.” Si Alexis Alexander, sakey ya part-time commuter Bethelite, et excited ya man-welcome ed saray man-tour. Oniay imbaga to: “Makapa-touch ya nanengneng so panangaro na saray agagi ed si Jehova tan ed abung To.”

Malikeliket si Mi-yeon Jo ya awiten so waloy taon ya anak ton si Yoon pian man-tour ed branch office diad South Korea. Lapud excited ya man-tour si Yoon, aga akaugip diad samay labi antis na pan-tour da. Oniay imbaga nen Mi-yeon: “Kabangon mi, dinengel min tampol imay kansion tungkol ed impan-tour nen Caleb tan Sophia ed Bethel. Tan legan kamin ombabiyahe paonlad branch, atan so dedengelen mi.” Na-enjoy ya maong nen Yoon so impan-tour da kanian oniay imbaga to: “No wala labat iray ayep ed Bethel, singa ak la walad paraiso.”

Si Noah Johnsen, kabataan ya lakin taga Alberta, Canada, et labalabay toy man-tour ed saray pasilidad ed Bethel diad New York, U.S.A. Pero walay sakit ton spinal muscular atrophy. Lapud kondisyon to, agto sarag so onlugan ed eroplano, kanian say ginawa na atateng to, nambiahe ira na manga 4,100 kilometers pian makapan-tour ed United States branch diad Wallkill, New York. Oniay alikna nen Noah: “Sarag kon i-describe ed sakey labat ya salita so naeksperiensyak ed impan-tour mi​—panangaro. Alikliknak ya inar-aro ak nen Jehova tan saray agagi.”

Excited so 76 años ya si Fyodor Zhitnikov tan say asawa ton si Yulita ya man-tour ed museum diad Bethel ed Kazakhstan. Diad sakey ya seksion na museum, nanengneng ditan so istorya na matoor ya impanlingkor na pigaran agagi tayo diad dakel ya taon. Espisyal iyan exhibit ed si Fyodor ta akaiba to nin nanlingkor so dakel ed sikara. Misatsalamat si Fyodor ed saray agagin nansagpot pian niparaan iyan exhibit. Oniay imbaga to: “No importante ed saray agagi iray ginawa tayo parad si Jehova, di lalo lay Aman Jehova​—pabpablien tan agton balot nalingwanan so amin ya ginawa tayo parad sikato.”

Malikeliket tayo ta pribilehyo tayo lamet ya na-welcome iray agagi tayo ya man-tour ed saray Bethel diad interon mundo. Talaranan tayo so pan-welcome ed nilibo nin agagi ya man-tour diad ontutumbok iran agew.​—Salmo 122:1.

Nanengneng ed leksab so litrato na saray agagi ya nan-tour diad saray nanduruman pasilidad tan museum na Bethel.