Nen Sabado, Oktubre 5, 2019, agawa so tinaon ya miting na Watch Tower Bible and Tract Society of Pennsylvania ed Assembly Hall na Saray Tasi nen Jehova diad Newburgh, New York, U.S.A. Kayari na miting, impresenta na Mananguley ya Ulop so makapabiskeg ya espiritual a programa ed 20,679 ya inmatendi, kaiba la ray akakonekta ed arum ya venue. Nia ra so sumaryo na kada parte. *

Impaliwawa nen Brother Gerrit Lösch, say chairman na programa, so panlukas a parte ya nibase ed Mateo 23:10, impanonot to ed sikatayo ya si Jesu-Kristo so lider tayo, aliwan siopaman ya too.

Impaliwawa nen Brother Stephen Lett so kaimportantian na pagmaliw ya maiter. Say sakey a paraan pian nipanengneng tayon maiter itayo et diad pansuporta tayo ed relief work tayo. Insumaryo nen Brother Lett iray epekto na natural iran kalamidad tan saray ginawa tayon relief effort legan na 2018 tan 2019 iran serbisyon taon. Masulok ya 900,000 ya agagi so naapektoan na saray kalamidad; masulok a 700 ya Kingdom Hall tan 15,000 ya abung na agagi tayo so naapektoan odino aderal. Saray Tasi nen Jehova et nanggastos na 49.5 milyon a dolyar parad relief work.

Kaiba ed sayan parte iray video na saray agagi ya impapuson misalsalamat lapud atulongan ira ed relief work tayo.

Nabantayan ed sayan video no panon ya aasikasoen na Saray Tasi nen Jehova so manga 80,000 ya bilding tayo diad interon mundo. Indanet met ed video iray paraan no panon ya mintinaen, i-renovate, tan ipaalagey iray teokratikon pasilidad tayo.

Kaiba ed sayan video iray abayag lan interbyu na taloran brother ya tinmulong nensaman ed pampili tan pangaliw na saray property parad United States branch tan world headquarters. Sarayan brother et si Max Larson, George Couch, tan Gilbert Nazaroff. Impaliwawa da no panon iran tinulongan nen Jehova pian nasaliw iray nanduruman property tayo.

Inyanunsio ed sayan video so plano na Saray Tasi nen Jehova ya paniibaen so media production ed sakey a balon pasilidad ya ipaalagey ed Ramapo, New York. Say kawalaan na sayan property et manga 3 kilometro manlapud world headquarters ed Warwick, New York. Say goal et umpisaan ya ipaalagey itan no 2022 tan nasumpal no Disyembre 2026. Legan ya ipapaalagey so proyekto, kaukolan so manga 1,500 ya boluntaryo kada agew.

Impaliwawa ed sayan video ya manlapud Enero 2020, saray manangipalapag ya labay dan palaknaben so ministeryo ra et nayari lan man-fill out na saray application diad jw.org tan i-submit iratan ed ulop na mamatatken na kongregasyon pian narebyu iratan.

Nayari la natan ya na-access iray audio file diad jw.org panamegley na Amazon Alexa odino Google Assistant.

Impalinew nen Brother David Splane so pakatalos tayo ed propesiya ya nabasa ed Joel kapitulo 2 ya mangidedeskribe ed amungkog ya duron. Talaranan tayo so panaral ed sayan linminew ya pakatalos no ompaway la itan ed Say Panag-bantayan.

Indanet nen Brother Samuel Herd iray gunggona na New World Translation of the Holy Scriptures (Study Edition) ya nayarin na-access online. Insan to in-release so inimprintan kopya na New World Translation of the Holy Scriptures (Study Edition) ya manlapud libro na Mateo anggad Gawa. Nayarin man-request na kopya iray manangipalapag diad kongregasyon da.

Indanet nen Brother Anthony Morris ya say pangipulong na maong a balita so sankaimportantian ya kimey parad saray tuan Kristiano. Makakatulong iray teokratikon pasilidad pian naorganisa na Mananguley ya Ulop so panagpulong a kimey tan pian nitarya day espiritual ya naakan parad totoo nen Jehova. Binitla nen Brother Morris iray makapaseseg iran salita manlapud Nobyembre 15, 1976, ya isyu na The Watchtower: “Nepeg ya nasabian itayo na ‘baleg a kairapan’ ya mamapasyan maong ed panagpulong a kimey, diad sankalaknaban lan kasumpalan na satan. No onsabi si Jesus pian ukomen iray totoo, nabigla so amin​—anggan saray totoo nen Jehova, lapud okupado iran maong ed panggagawa na linawa nen Jehova!”

Impaliwawa nen Brother Mark Sanderson ya singa impropesiya nen Jesus, ilaloan na saray totoo na Dios ya busolen ira na “amin a nasyon.” (Mateo 24:9) Balet pinaseseg itayo nen Brother Sanderson ya agtakotan so too, noagta si Jehova.​—Salmo 111:10.

Walay makapaseseg a video nipaakar ed saray agagi ed Russia. Impaliwawa da no panon dan adaeg so takot ed panamasegsegang. Papasesegen na sayan paliwawa tan video so amin ya totoo nen Jehova ya pansagpotan day nawalaan na ontan met ya determinasyon.

Impaliwawa nen Brother Geoffrey Jackson diad praktikal a paraan iray teksto ed Kristianon Griegon Kasulatan ya manguusar na termino ya literal a mankabaliksan ya “manlikas.” Indanet to met ya importantin itultuloy tayoy “manlikas diad amin ya paraan” legan na sarayan kaunoran iran agew.​—1 Pedro 1:13.

Inyanunsio nen Brother Kenneth Cook so teksto ed taon 2020, ya nibase ed Mateo 28:19: “Onla kayo sirin tan ibangat yo iray totoo . . . pian magmaliw iran disipulok, a bautismoan yo ra.” Indanet to ya kaukolan ya tulongan iramay walaan na dugan kipapasen na puso pian idedika day bilay da ed si Jehova tan manpabautismo.

Saray espiritual ya programa ya singa say annual meeting so mamaseseg ed sikatayon iter so anggaay nayarian tayod panaglingkor ed si Jehova.