Lapud mas mainomay ya naalisan na sakit iray maedad la, sarayan agagi et uunoren da so ibabaga na saray health official ya mansiansia labat ira ed panaayaman da. Balet, agda naliliknan bukbukor da tan anggapoy gagawaen da. Manguusar ira na nanduruman teknolohiya pian makaatendi irad saray aral tan nagawaan day ministeryo da.

Diad Rome, Italy, sakey ya sister ya 94 años, ya abautismoan nen 1952, so agmakaalis ed ayaman to manlapu la nen ginmapo so pandemic. Sikatoy manbabantay na saray aral ed JW Stream, tan mataltalag ton nanengneng iray agagi. Balet lapud inyuksoy na saray elder so videoconferencing, naynay la natan ya makakaatendi tan nanenengneng to iray agagi ed saray pantitipon na kongregasyon da.

Diad Spanish Fork, Utah, U.S.A., si Sister Stephanie Aitken, sakey ya emel, et manaayam ed nursing home tan matalag natan ya nabibisita lapud pandemic. Sikatoy tinulongan na sakey ya elder kaibay asawa to no panon ton ni-download so videoconferencing app ed gadyet to panamegley na sign language anggaman diad baetan da et walay salming ya kapot na pasilidad. Nen a-download nen Sister Aitken so app, malikeliket ton nilakap so gadyet to. Sikatoy misalsalamat lapud makakakonekta la ed kongregasyon to.

Legan ya uusaren na saray agagi, kaiba la iray maedad la so teknolohiya ed sarayan mair-irap iran situasyon, naynay ya ipapanonot nen Jehova iray sipan to ed saray lingkor to ya makabat dan usaren so “gatas na saray nasyon.” (Isaias 60:16) Amta tayo ya sikatoy magmaliw ya antokaman pian niiter so pankaukolan na saray lingkor to ed sayan makapaaburidon panaon.