Israel tan Saray Teritorya na Palestina

• Nen Mayo 10, 2021, binmetag so guerra ed Israel tan saray teritorya na Palestina, tan dakdakel so inatey

• Dakdakel so aderal ya abung tan negosyo diad saray baley na Israel ya wala ray manaayam ya Judio tan Arabo

• Anggapoy asakitan ed saray masulok ya 2,000 ya manangipalapag ya manaayam ed Israel tan diad saray teritorya na Palestina

• 73 ya manangipalapag so inmalis ed saray ayaman da, kaiba lay 15 ya agagin manlilingkor bilang special full-time servant ya anggapod Bethel. 13 ya Bethelite so temporaryon maniiba ed saray ayaman ya walaan na bomb shelter

• 6 ya abung so medyo aderal

• Walay Disaster Relief Committee ya mangiyuuksoy ed pangiter na relief tan mitutulongan itan ed saray manangasikaso na sirkito tan saray elder ed satan ya lugar pian nipasabi iray praktikal ya tulong

• Mitutulongan met iray manangasikaso na sirkito ed saray elder pian makapangiter iray ligliwa ya manlapud Biblia ed saray manangipalapag

• Seseguroen na amin ya agagin ontutulong ya natutumbok da iray COVID-19 safety protocol

Lapud saray aral et gagawaen panamegley na videoconference, tuloytuloy ni iratan. Nen Mayo 15, abantayan na saray agagi so livestream na sirkiton asemblea ra panamegley na JW Stream–Studio. Amitlo ya intundan magano so programa ed ngarem lapud saray alarm ya pinaknol na saray autoridad. Akatulong irayan alarm pian naamtaan na saray agagi ya kaukolan day onlan magano ed saray protektadon pasen singa diad silong na takayan odino diad bomb shelter. Anggano walay guerra, ami-amin et 804 ya manangipalapag so kinmonekta ed asemblea ra diad salitan Hebreo. Tan 297 ya manangipalapag so kinmonekta ed asemblea ra ya Tagalog. No Mayo 22 et aka-eskedyul so sirkiton asemblea na limaran kongregasyon ya mansasalitay Arabic diad Israel tan diad saray teritorya na Palestina.

Saray agagi tayon apektado ed sarayan mair-irap ya situasyon et tuloytuloy ya manmamatalek ed si Jehova tan sikato so pansasalimbengan da.—Salmo 91:1, 2, 5.