Nen Hulyo 18, 2021, in-release nen Brother Arturo Manzanares, membro na Central America Branch Committee, so Balon Mundo a Patalos na Kristianon Griegon Kasulatan ed lenguahen Tojolabal.

Masulok ya 66,000 ya totoo so mansasalita na Tojolabal diad Chiapas ya walad bandad southeast na Mexico ya asingger lad Guatemala. In-release so electronic format na Biblia legan na programa ya akauna lan in-record ya abantayan na manga 2,800 ya totoo panamegley na streaming.

“Akin et kaukolan tayoy Biblia ed salitan Tojolabal?” so intepet na espiker legan na programa. Inebatan to lanlamang itan, kuan to: “Lapud importante ya nawalaan itayoy Biblia ya mamapagalang ed Autor na satan, si Jehova.”

Oniay imbaga na sakey ya sister ya tinmulong ed panagpatalos: “Sinmabid pusok imay abasak ed Juan 5:28, 29. Naiimadyin kon onoli lay mama’k. Aminpigak lan abasa iratan ya bersikulo ed Spanish, pero natan ya babasaen ko la itan ed lenguahek, nagmaliw ya mas makabaliksan itan. Baleg ya salamat!”

Legan ya gagawaen so proyekto, inmalis so translation team ya datin walad Central America branch, asingger ed Mexico City, diad balon remote translation office ed Las Margaritas, Chiapas. Say opisina et wala la natan ed pasen ya kawalaan na saray mansasalitay Tojolabal, 990 kilometro so kaarawi to ed branch. Natan, walay siameran managpatalos ya full-time ya manlilingkor ed remote translation office, kaiba day limaran brother ed support department. Anggano makapantalosan iray mansasalita na Tojolabal ya walad nanduruman pasen, wala ray daiset ya pandumaan na saray salita ra. Sineguro na saray managpatalos ya nipatalos so Kristianon Griegon Kasulatan ya susto tan mainomay ya natalosan na karaklan.

Singa bilang, impatalos na arum ya Biblia ed satan ya lenguahe so “Panarian na Dios” bilang “pasen ya panlalapuan na ganggan na Dios” odino “say baley (o syudad) na Dios.” Balet anggapoy kabaliksan na saratan ya patalos ed saray manbabasa ya agmanguusar ed saratan ya salita. Diad Balon Mundo a Patalos ed Tojolabal, satan ya balikas et impatalos bilang “Gobierno na Dios,” tan mas mainomay itan ya natalosan.

“Seguradon inggiya nen Jehova iray nankimey ed sayan proyekto pian nagawa ran malinew, susto, tan mainomay ya basaen so patalos,” so kuan na sister ya akaatendi ed programa. “Segurado ak ya nasabi na sayan regalo so puso na dakel ya totoon agda ni kabat so Dios.”—Gawa 17:27.