Nen Nobyembre 4, 2019, temporaryon imbulos so duaran agi tayon masulok ya sakey bulan ya impriso, si Tirtha Maya Ghale tan Pushpa Ghimire. Senentensiaan ira na korte na taloran bulan ya pakapriso lapu labat ed pandadayew da ed Dios, sakey a kanepegan ya bibidbiren na Nepal tan na international law.

Nen Nobyembre 2018, inaresto si Sister Ghale tan Sister Ghimire lapud pupulongan da ray totoon interesado ed Biblia ya walad gilig na karsada. Kayari 13 agew na impakapriso da, pinanmulta da ra na agaylay kabaleg ya kantidad, 100,000 Nepalese rupees (manga Php 47,000), insan labat ira imbulos. Balet, inimbestigaan ni ran siansia na saray autoridad.

Nen Disyembre 10, 2018, inggapo so panlitis ed kaso na sarayan sister tan binmayag itan na samploran bulan. Nen Setyembre 25, 2019, senentensiaan ira na District Court na Rupandehi na taloran bulan ya pakapriso tan manmulta so kada sakey na 2,500 Nepalese rupees (manga Php 1,160).

Nandesisyon so judge ya guilty so duaran agi tayo lapud sasalien da kunon salatan so relihyon na arum diad pangiiter da na saray publikasyon tayo. Say Nepal et membro na United Nations tan sakey ya partido na International Covenant on Civil and Political Rights, kanian obligasyon na gobierno na Nepal ya seguroen ya walay kawayangan na saray totoo to ya mansalat na relihyoson papanisiaan da tan bulos iran gawaen itan ed publiko odino ed pribadon lugar. Base ed si Sister Ghale tan Sister Ghimire, agda pipiliten so arum ya mansalat na relihyon noagta manginanabang labat ira na saray literatura ya base ed Biblia diad saramay malabay ya ondengel. Kanian nen Oktubre 31, 2019, inmapela ed Atagey a Korte iray abogado na agagi tayo. Nandesisyon so Atagey a Korte ya agla kaukolan ya ipriso so duaran agi tayo legan ya aalagaren so panlitis na korte ed kaso da, kanian imbulos la ra.

Ipikasi tayon tuloytuloy ya ikdan nen Jehova na masanton espiritu to si Sister Ghale tan Sister Ghimire pian walay biskeg, liket, tan kareenan da legan dan aalagaren so sampot ya sentensia ed sikara na korte na apela.​—Roma 15:13.