Nen Abril 21, 2024 in-release nen Brother Dean Jacek, sakey ya membro na Branch Committee na Pilipinas, so libro na Biblia ya Mateo ed Filipino Sign Language legan na espisyal ya programa ya ginawa ed branch office na Pilipinas diad Quezon City. Ami-amin et 413 ya agagi so inmatendi ya personal. Tan wala ni 3,998 ya nambantay ed nanduruman pasen na bansa panamegley na videoconference. Diad saman ya agew et nayari lan i-download ya tampol so in-release ya libro na Biblia diad jw.org tan diad JW Library Sign Language app.

Base ed tantiya, manga 500,000 ya totoo so manguusar na Filipino Sign Language. Abuo so sankaunaan ya Filipino Sign Language congregation diad Quezon City nen 1999 tan inggapon ipatalos iray publikasyon ya nibase ed Biblia ed satan ya lenguahe nen 2011. Natan et masulok ya 3,000 ya agagi so manlilingkor ed 72 ya sign-language ya kongregasyon tan grupo ed interon Pilipinas.

Saya so sankaunaan ya kompleton libro na Biblia ya nipatalos ed Filipino Sign Language. Oniay insinyas na sakey ya emel ya brother: “Nen anggapo ni ’yan release, pigpigara labat ya bersikulo na libro na Mateo so walad lenguahe mi. Singa wala labat so pigaran piraso mi na baleg ya puzzle. Pero natan, nanenengneng mi la so kabuoan ya itsura na puzzle!” Onia ni inyarum na elder ya manlilingkor ed sakey ya Filipino Sign Language ya kongregasyon: “Dakdakel iray prinsipyo ed libro na Mateo ya mausa-usar ed pan-shepherding tan ed pampaseseg ed saray agagi ed kongregasyon. Singa bilang, papasesegen itayo na Mateo 5:23, 24 ya mikareenan ed saray agagi tayo no wala ray pambabarongan tayo. Misatsalamat ak ed si Jehova ta wala lad lenguahe mi irayan importantin leksion.”

Malikeliket tayo ta ni-release la so libro na Mateo ed Filipino Sign Language tan segurado tayon makatulong itan ed dakel nin totoo ya matua so puso ra pian minabang ira ed Salita na Dios.​—Mateo 7:24, 25.