Nen Hulyo 27, 2022, walay agawan magnitude 7.0 ya yegyeg ed isla na Luzon diad Pilipinas. Naapektoan ya maong so probinsya na Abra. Tan alikas itan ya anggad Manila, anggano manga 400 kilometro la so kaarawi to ed epicenter. Tan wala ray inreport ya masulok ya 2,000 iran aftershock.

• Anggapoy agi tayon inatey

• 4 ya manangipalapag so asugatan

• 42 so pamilyan nan-evacuate

• 63 ya abung so medyo aderal

• 1 ya abung so aderal ya maong

• 13 ya Kingdom Hall so aderal

• 1 ya Disaster Relief Committee so ni-assign ya mangorganisa ed pangiter na relief

• Pinaseseg na saray elder ed apektadon lugar iray naapektoan na yegyeg

• Tutumboken iray safety protocol na COVID-19 legan ya iiter iray relief

Tampol ya angiter so branch office na saray relief ed saray agagi tayon naapektoan na yegyeg tan inyanapan da ray temporaryon napanayaman. Mantutulongan iray agagi tayo diad saray lugar ya naapektoan na yegyeg anggano sikaran mismo et apektado met.

Mabiskeg so pananisia tayon tulongan tan iliktar nen Jehova iray agagi tayo diad “panaoy gonigon.”—Salmo 50:15.