Inyanunsio nen Pebrero 6, 2019 so sentensia na Zheleznodorozhniy District Court na Oryol ed si Dennis Christensen ya napriso na anemiran taon lapud mareen ya pandadayew tod Dios. Peles iyan iyaapela ed mas atagey a korte pian nauman so sentensia ed sikato.

Sayan anemiran taon ya sentensia ed si Christensen et tampol ya angalay atension ed interon mundo. Saray internasyonal ya organisasyon, singa say Council of Europe, European Union, United States Commission on International Religious Freedom, Office of the United Nations High Commissioner for Human Rights, tan arum ni ran organisasyon et aliwan pabor ed aliwan mahustisya tan anggapoy basiyan ya impanlitis ed si Dennis Christensen.

Oniay kabiangan na imbaga na U.N. High Commissioner for Human Rights, ya si Michelle Bachelet: “Sayan maruksan sentensia ed si Christensen so magmaliw ya mapeligron pangaligan, tan gawaen ton ilegal so kanepegan a manpili na relihyon odino pananisia na saray Tasi nen Jehova diad Russia.” Imbaga tod gobierno na Russia ya kaukolan dan “umanen so Federal Law nipaakar ed Pamatunda ed Gagawaen na Saray Extremist pian nipalinew no anto ray nayarin kaiba ed ‘gagawaen na saray extremist,’ tan seguroen ya saraman labat so kagagawa ya maruksa tan walaay panagbusol so kaiba ed satan.” Diad sampot et kinerew nen Ms. Bachelet ed saray autoridad “ya itunda la so pangaakusa da tan ibulos da la so amin ya impriso da lapu labat ta gagawaen day karapatan da ya manpili na relihyon odino pananisia, karapatan dan mannonot tan ibalikas so sarili dan opinyon, tan karapatan dan mareen ya mantitipon.”

Duay agew kayarin asentensiaan si Brother Christensen, angorganisa na press conference ed Moscow so apatiran kabkabat ya eksperto ed human rights diad Russia. Napnapno so venue, tan masulok ya 6,000 so nambantay na live ya programa diad Internet ya manga sakey oras so karukey to. Amin ya eksperto ya nansalita diad programa et indepensa da iray Tasi nen Jehova, imbaga ran mareen iran totoo tan aliwa ran problema na komunidad.

Nansalita met ed press conference so asawa nen Brother Christensen ya si Irina; say abogado to ya si Mr. Anton Bogdanov; tan say representative na European Association of Jehovah’s Witnesses ya si Yaroslav Sivulskiy. Nansalita ra nipaakar ed samay aliwan mahustisya ya sentensia tan inebatan da iray tepet na saray managbalita.

Anggaman apriso na ngalngali duay taon si Brother Christensen, napansiasiansia toy liket to tan say determinasyon ton manmatalek ed si Jehova. Pigaran agew antis na sentensia ed sikato, legan ton ibabalikas so sampot ya mensahe to ed korte, oniay imbaga nen Brother Christensen: “Naamtaan lanlamang so tua, tan atan so nagawa ed sayan kaso.” Kayari ton binasa so Apocalipsis 21:3-5, matalek ton imbaga: “Sarayan salita . . . et mangipapanengneng ed panaon sano iter la na Dios so hustisya tan tuan kawayangan parad amin ya totoo. Say pagmaliw ya bulos tan say inkahustisya et mankonektaan. Seguroen na Dios ya nagawa irayan amin.”

Alagaren nen Brother Christensen so desisyon na apela legan ya akapriso ed Detention Facility No. 1 diad Oryol Region​—ya akaprisoan to la diad apalabas ya 20 bulan.