Nen Setyembre 2, 2019, senentensiaan na Zheleznodorozhniy District Court na syudad na Khabarovsk, Russia, si Brother Valeriy Moskalenko na duay taon tan duay bulan ya panggaway serbisyo parad komunidad tan anem bulan ni ya walad probation. Anggapo lay kaaruman ya pakapriso to.

Kayarin niyanunsio so sentensia, imbulos la si Brother Moskalenko kanian malikeliket so pamilya tan kakaaro to. Sikatoy apriso manlapu la nen Agosto 2, 2018. Antis ya apriso, sikatoy mantratrabaho bilang assistant train conductor tan aasikasoen to so mansasakit ya ina to. No wala lad probation, agla makapaway ed syudad na Khabarovsk tan kada bulan et kaukolan toy onlan manreport ed saray pulis pian naseguro da ya anggapoy gagawaen ton ilegal odino krimen.

Diad samay sampot ya mensahe to ed korte nen Agosto 30, oniay kabiangan na imbaga nen Brother Moskalenko: “Agkon balot kontraen so linawa na Dios a malinlinew ya ibabaga na Biblia. Tan anggan panon so pandesdes odino pandusa ed siak, anggan nasentensiaan ak ni na patey, agkon balot ibeneg so makapanyarin-amin ya Amalsa ed uniberso, si Jehova a Dios.”

Oniay imbaga nen Yaroslav Sivulskiy, sakey a representative na European Association of Jehovah’s Witnesses: “Anggano ag-itayo miabobon ed desisyon na korte, maliket itayo ya makasempet lay Valeriy.”

Likud ed si Brother Moskalenko, wala ni pitoran agagi tayo ed sakop na Khabarovsk ya manaalagar na desisyon ed saray kriminal ya kason inyakusa ed sikara.

Misalamat tayo ed si Jehova ya apansiansia nen Brother Moskalenko so mabiskeg ya pananisia to legan ya walad prisoan. Ipikasi tayo ya tuloytuloy nin pabiskegen nen Jehova so amin ya agagi tayon napapairap lapud saray nibase ed Biblia ya papanisiaan da.​—Isaias 40:31.