Nen Agosto 13, 2019, ingganggan na korte na apela diad syudad na Kirov ya ibulos si Brother Andrey Suvorkov, mantaon na 26, ed impaka-house arrest to. Balet, anggano naikdan na kaaruman ya kawayangan si Brother Suvorkov, siansian agni asumpal so kriminal a kaso ya inyakusa ed sikato.

Singa nibaga la ed akaunan report, naaresto si Brother Suvorkov pati say stepfather to tan talora nin brother sanen ni-raid na saray pulis tan special forces ya asakoban so lupa ra so 19 ya abung ed Kirov nen Oktubre 9, 2018.

Oniay nanonotan nen Brother Suvorkov ya agawa nen ni-raid so abung da: “Dakel ed saray mablin gamit mi so inala ra. Balet agmi nanaburidoan itan nen asawak, ta dati mi lan papasimplien so bilay mi tan pansasagpotan min agmasyadon manpokus ed saray materyal a bengatla. Akatulong ed sikami so bilin ed Mateo 6:21 ya ‘no iner so kawalaay kayamanan mo, diman met so kawalaan na pusom,’ pian makapansiansia kamin kalmado.”

Kayari na saray raid, inyakusa iray kriminal ya kaso ed si Brother Suvorkov, say stepfather to, tan talora nin brother lapud pangakansion da na saray Kingdom song, panaaral da na saray literatura ya walay koneksion to ed relihyon, tan lapud walay kopya da na Russian ya New World Translation of the Holy Scriptures. Amin ira et niiyan ed temporaryon prisoan legan dan aalagaren so desisyon na korte, balanglan nibulos ira odino nipriso ira antis ya igapon litisen so kaso da.

Oniay impangideskribe nen Brother Suvorkov ed agawad sikato: “Duay labi ak ed temporaryon prisoan. Diad gapo, agak tinmundan manpikasi. Segurado ak ya dinengel ak nen Jehova tan suportaan to ak. Ninonot ko ray tono na saray Kingdom song tayo tan kinansion ko iratan. Anggad masulok ya 50 ya kansion so anonotan ko.”

Nandesisyon so korte ya iyan si Brother Suvorkov tan saray arum ni ed prisoan parad saray agni alitis so kaso ra. Legan na unonan simba to ya akapriso, nampokus si Brother Suvorkov ed itulong ed arum. Oniay nanonotan to: “Naisip ko ya bitlaen so ngaran na saray agagi diad pikakasik tan mangipawit ak na saray makapaseseg ya sulat ed saramay nanonotan koy address da. Talagan panliketan ko iman.”​—Gawa 20:35.

Kayari pigaran bulan, sarayan brother et niyalis lanlamang ed house arrest, puera labat si Brother Andrzej Oniszczuk. Diad saramay brother ya tagad Kirov, si Brother Suvorkov so sankaunaan ya nibulos ed impaka-house arrest to.

“No isipen ko imay agawa,” so kuan nen Brother Suvorkov, “Malikeliket ak ta naeksperiensyak so nipriso. . . . Agko amta no antoy nagawa ed arapen odino kasin nipriso ak lamet. Wala lay talek ko natan ya suportaan ak nen Jehova tan say organisasyon to, anggano wala ak ed prisoan. Say anggapod siak et say takot ya nipriso.”