Asingger lan iyanunsio na Neftekumskiy District Court na Stavropol Territory so desisyon ed kaso di Brother Aleksandr Akopov, Konstantin Samsonov, tan Shamil Sultanov. * Agni impaamta na prosecutor so nayarin magmaliw ya dusa ed sikato.

Aleksandr Akopov

• Inkiyanak: 1992 (Neftekumsk)

• Arum ya impormasyon ed bilay to: Mantratrabaho ed konstruksion kaibay tatay tan kuya to. Mahilig ya manggalaw na soccer, basketball, tan tennis. Labalabay to met so manluto tan onnengneng ed balibali iran kaliberliber

  Abautismoan ya Tasi nen Jehova nen 2007 diad edad ya 14

Konstantin Samsonov

• Inkiyanak: 1977 (Neftekumsk)

• Arum ya impormasyon ed bilay to: Labalabay toy man-chess tan mahilig ed teknolohiya nen ugaw ni. Diad kaplesan et mantratrabaho bilang systems engineer diad sakey ya ospital. Nen 1998, sikara nen asawa to ya si Svetlana et nanaral na Biblia ya kaiba iray Tasi nen Jehova. Abautismoan ira nen 2000. Walay sakey ya anak dan laki

Shamil Sultanov

• Inkiyanak: 1977 (Mahmud-Mekteb, Stavropol Territory)

• Arum ya impormasyon ed bilay to: Manmimintina tan manaapiger na saray bilding. Nanaral na Biblia kaiba iray Tasi nen Jehova diad bandad gapo na 2000. Abautismoan nen 2003. Nankasal ira nen Elena nen 2004. Walay anak ya laki nen Elena ed unaan ya asawa to tan sikaran dua so nampabaleg ed satan

Nen Sabado, Agosto 26, 2017, pinaliberan na saray armadon pulis so 18 Tasi nen Jehova ya manbabakasyon ed sakey a pasen ya asingger ed Neftekumsk. Inawit da ra, anggan saray ugugaw tan maedad la, tan pinalugan da rad bus tan inyakar da rad istasyon na pulis. Taloran oras da ran tinetepetan diman. Kayari na satan, wala ray agagi diad Neftekumsk ya minanmanan insan inimbestigaan so kaabungan da. Inaresto si Aleksandr, Konstantin, tan Shamil tan ngalngali sakey taon iran impriso antis nin litisen.

Inamin nen Aleksandr ya antakot toy napriso ta walay anxiety disorder to tan arum ni ran sakit. Kinerew tod si Jehova ya nawalaan komon na biskeg diad mental tan emosyonal pian makapansungdo diad prisoan. “Wala ray panaon ya ibabagak ed si Jehova ya agko la sarag,” so kuan nen Aleksandr. “Pero agak makapanisia ya naanosan koy [ngalngali] sakey taon diad prisoan.” Naebatan iray pikakasi to ta tinulongan nen Jehova ya nanonotan iray teksto ed Biblia anggano anggapoy Biblia to. Insulat to so kada teksto ya nanonotan to, aralen toy sakey ya teksto kada kabuasan, insan to isipen no panon ya makatulong iman ya teksto diad situasyon to. Atan so akatulong ed sikato ya naalig so panagnonot nen Jehova.

Mas akapampakpel si Konstantin lapud saray sulat na asawa to. Nanonotan to ya diad sakey ya sulat, imbaga nen asawa to ya ipasen ton singa adventure so mairap ya situasyon to. “Akatulong iman ed siak, tan anggan panon et linmemew so liknaan ko anggano mairap so situasyon,” so kuan nen Konstantin.

Imbaga nen Shamil ya sankairapan iramay unonan bulan to diad prisoan. “Apasalan ko met lanlamang kalabas na panaon,” so kuan nen Shamil. “Prueba iya ya agak balot apaulyanan.” Legan na saman ya panaon, naaralan toy manmatalek ed si Jehova tan agpampagaan iray onsabin subok diad arapen.

Sarayan taloran brother et limitadoy sarag dan laen tan agmet ira nayarin mangusar na cellphone tan Internet. Lapud saratan et nairapan lay Aleksandr ya manpatambal tan agla makapantrabaho si Konstantin bilang computer programmer. Balet determinado irayan brother ya mansiansian matoor ed Dios anggano wala iratan ya subok.

Amta tayo ya bendisyonan ira nen Jehova legan iran tuloytuloy ya manmamatalek ed sikato.—Salmo 20:7.