Asingger lan iyanunsio na Zheleznodorozhny District Court na Krasnoyarsk so sentensia ed kaso nen Brother Andrey Stupnikov. * Agni impaamta na prosecutor so nayarin magmaliw ya dusa ed sikato.

Andrey Stupnikov

• Inkiyanak: 1973 (Norilsk, Krasnoyarsk Territory)

• Arum ya impormasyon ed bilay to: Sakey ya engineer diad panag-minaan na langis tan gas. Nankasal ira nen Olga nen 1993. Mahilig iran sanasawa ed arts tan labalabay day mankimey ed paway tan ompasyar

  Manlapu lad inkaugaw to, labalabay to lay makaaral nipaakar ed Dios. Wala ray aliwliwan naeksperiensya to nen nanayam ed Chechnya legan na unonan Chechen war. Sankanonot to no akin ya wala ray aliwliwan nagagawa tan no antoy gawaen to pian naprotektaan na Dios. Nanaral iran dua nen Olga na Biblia kaiba iray Tasi nen Jehova. Aliketan ira nen naamtaan dan wala iray propesiya ed Biblia ya nagagawa la tan no panon ya makatulong so Biblia ed saray mairap ya situasyon

Nen Hulyo 3, 2018, inaresto na saray Federal Security Service (FSB) agent si Brother Andrey Stupnikov diad Krasnoyarsk International Airport. Sikato so unaan ya Tasi diad Krasnoyarsk ya inaresto tan inakusaan. Diad tinmumbok ya agew, ingganggan na Zheleznodorozhny District Court na Krasnoyarsk ya sikatoy ipriso antis ya litisen.

Susulatan nen Olga si Andrey pian napaseseg. Balet inmaburidoy Andrey nen biglan agla makakaawat na sulat manlapud asawa to. Oniay imbaga nen Andrey no akin ya mas lalon apagaan: “Walay laki ya inmasingger ed siak insan to ak tinepetan ya, ‘Antam la no antoy agawad asawam?’” Ag-abayag, naamtaan to ya gagagalaen manaya na mangaasikaso na prisoan ya ag-iter ed sikato iray sulat nen Olga. Oniay kuan nen Andrey: “Imbaga dad siak ya makapawil ak lan tampol ed si asawak no mitulongan ak ed sikara tan ibagak ya walay kasalanan ko.” Balet nanmatalek ed si Jehova si Andrey tan agbalot akikompromiso. Kayari ton inanosan so waloran bulan ya impakapriso, a-house arrest na apatiran bulan.

Nen Hulyo 2, 2019, nibulos lad impaka-house arrest si Andrey. Balet sikatoy sinebelan ya mangipawit tan mangawat na email tan agmet nayarin mangusar na Internet. Nilimitaan met na saray autoridad no siopa ray nayari ton pitongtongan.

Legan ton aalagaren so desisyon na korte ed kaso to, manpopokus si Andrey ed dedikasyon tod si Jehova. Oniay mapekder ya imbaga to: “Proud ak ya kabat koy Jehova tan agto ak balot paulyanan.”

Misalamat tayod balibalin alimbawa nen Andrey lapud sigpot ya manmamatalek ed tulong nen Jehova.—Salmo 28:7.