Inyeskedyul nen Judge Ivan Belykh na Zheleznodorozhniy District Court na Khabarovsk so pangiyanunsio ed desisyon na korte ed kaso na 52 años ya si Brother Valeriy Moskalenko no Setyembre 2, 2019.

Si Brother Moskalenko et impriso la antis nin litisen so kaso to manlapu la nen sikatoy inaresto ed kabuasan na Agosto 2, 2018, sanen ni-raid na Federal Security Service (FSB) tan saray pulis so abung to. Manga limaran oras ya ininspeksion na saray agent so abung nen Brother Moskalenko antis dan inaresto. Lapud ta masulok ya sakey taon ya impriso, iisipen na arum ya ompan say sentensia ed sikato et mipara ed si Dennis Christensen.

Nen Disyembre 18, 2018, impasa ed European Court of Human Rights (ECHR) so reklamo ya Moskalenko v. Russia. Masulok ya 50 ya aplikasyon ya kontra ed Russia so impasa ed ECHR, tan 34 ed saratan so impaimano la ed gobierno na Russia.

Proud itayo ed saray inar-aro tayon agagi ed Russia ‘lapud panagsungdo tan pananisia ra anggaman makakasagmak iray panamasegsegang tan irap.’ Talagan susuportaan tan bebendisyonan ira nen Aman Jehova. Ipipikasi tayon tuloytuloy To nin ikdan na biskeg si Brother Moskalenko pian makapansungdo ya walaay liket antokaman so desisyon ed kaso to diad ontumbok ya simba.​—2 Tesalonica 1:4.