Nen Nobyembre 5, 2019, senentensiaan na Oktyabrsky District Court na Tomsk si Brother Sergey Klimov ya anem taon ya napriso. Si Dennis Christensen labat so arum nin agi ed Russia ya senentensiaan na ontan kabayag. Duma balet ed kaso nen Brother Klimov ta aminpigan angiter so korte na kaaruman iran restriksion ed sikato, kanian atan la so sankagrabian ya impansentensia ed sakey ed saray agagi tayo manlapu la nen insebel na Korte Suprema na Russia so kimey na Saray Tasi nen Jehova nen 2017.

Inaresto si Brother Klimov nen Hunyo 3, 2018 kayarin ni-raid na saray mangipapaakseb na ley, kaiba la ray pulis, so duaran abung na Saray Tasi nen Jehova. Manga 30 ya agagi, kaiba lay 83 años ya sister, so inawit pian natepetan. Imbulos iran amin kayari da ran tinepetan, balet si Brother Klimov et atilak. Dakel ya kaso na krimen so inyakusa ed sikato, tan nandesisyon so korte ya sikatoy ipriso na duay bulan antis ya litisen. Aminpiton beses ya dinmukey so termino na pakapriso to, kanian anggano agni ginmapo so anemiran taon ya pakapriso to, sakey taon tan limaran bulan lan arawi ed asawa tan pamilya to.

Onapela iray abogado nen Brother Klimov lapud sentensia ed sikato. Sakey ni, nen Agosto 20, 2018, insegep lad European Court of Human Rights so kaso ya Klimov v. Russia nipaakar ed impakapriso to antis ya litisen.

Legan na taon 2019, anengneng tayo so indakel na impan-raid, impangaresto, tan impangipriso ed saray agagi tayo ed Russia antis iran litisen. Balet mansiasiansian matoor tan makpel iray agagi tayo. Napapaseseg itayo ta paneknek itan ya bebendisyonan nen Jehova so panmamatoor da ed sikato.​—Salmo 56:1-5, 9.