Asingger lan iyanunsio na Ussuriyskiy District Court na Primorye Territory so desisyon ed kaso nen Brother Vitaliy Ilinykh. *

Vitaliy Ilinykh

• Inkiyanak: 1974 (Ussuriysk, Primorye Territory)

• Arum ya impormasyon ed bilay to: Nan-graduate ed sakey ya police academy tan nantrabaho diad internal affairs department. Pankelawan to no akin ya ompapatey so too tan no antoy nagawa ed saray inatey. Nanaral na Biblia kaiba iray Tasi nen Jehova diad kapegleyan na 1990’s. Abautismoan nen 1999. Diad kaplesan et mantratrabaho bilang managlinis ed karsada. Nankasal ira nen asawa to ya si Irina nen 2006

Nen Pebrero 2019, inimbestigaan so abung nen Brother Vitaliy Ilinykh bilang kabiangan na kaso ya insampa ed saray kapananisiaan to diad syudad na Spassk-Dalniy. Nen Setyembre 18, 2019, inggapo na saray autoridad na Russia so imbestigasyon ed si Vitaliy. Nen Oktubre 23, 2019, inimbestigaan da lamet so abung to tan diad satan et inaresto da la tan impriso da na duaran agew. Legan ya walad prisoan, nampikasi ed si Jehova. “Agko amtay gawaen ko pero nen nampikasi ak, kinmalma ak tan dinmeen so nonot ko,” so kuan nen Vitaliy.

Nen nibulos la, walay restriksion to kanian agnayarin ombiahe. Say nanay to ya si Sister Olga Opaleva et lilitisen met ed sananey ya kaso.

Dakel so naaralan nen Vitaliy ed eksperiensya to. “Dati lan amtak ya ag-abuloyan nen Jehova iray subok ya agtayo nasarag. Anengneng kon tua itan ed mismon bilay ko. No kapigan mairap so situasyon tayo, diman tayo mas onaapit ed si Jehova,” so kuan nen Vitaliy. “Si Jehova so manmomoldi ed sikatayo. No abuloyan ton ondalan ak ed singa apoy iran subok, amtak ya tulongan to ak met ya naanosan itan ta atan so manmoldi ed siak. No bilang ta singa agko la nasarag, kerewen ko lad si Jehova so ‘pakayari a mas mabiskeg nen say pakayari na too.’”—2 Corinto 4:7.

Sipor ya mabaing si Vitaliy, balet akapampakpel lapud dinalepdep toy 1 Pedro 5:9. Napapaseseg met ed maabig ya alimbawa na dakel ya brother tan sister diad Russia ya asungdoan day panamasegsegang. Oniay determinado ton imbaga: “Antokaman so iyabuloy nen Jehova ya desisyon na korte, . . . pribilehyok so makapantasi ed saray autoridad diad sarayan kaunoran iran agew.”

Singa si Vitaliy, napapaseseg tayod dakel ya alimbawa na pananisia tan pakpel na saray totoo nen Jehova. Tan lanang tayon pisalamatan si Jehova lapud iikdan to tayo na ‘amin a maabig a bengatlan nakaukolan tayo pian nagawaan tayoy linawa to.’—Hebreo 13:20, 21.