Base ed samay akaunan report nen Mayo 23, 2019, sinuportaan na Oryol Regional Court so sentensia ed si Dennis Christensen. Kanian siansia nin kaukolan ya napriso na anemiran taon si Brother Christensen. Balet lapud apriso la na duaran taon antis na impanlitis ed sikato, ya unong ed ley na Russia et ipapasen ya mipetekan ed taloy taon ya pakapriso, wala ni keran taloy taon ya pakapriso to. Diad labi na Hunyo 6, 2019, inyalis si Brother Christensen ed sakey a kampo ya pantrabahoan na saray priso pian sumpalen so sentensia to. Onapela si Brother Christensen ed European Court of Human Rights (ECHR) pian nauman so sentensia to. Wala lad ECHR so kerew to ya ideklara ya aliwan mahustisya so impakapriso to antis ya nilitis.

Pandinayewan tayo so inkakalmado tan pansusungdo nen Brother Christensen anggano makakaeksperiensya na ag-inkahustisya. Makaseguro tayo ya sikatoy tuloytuloy ya tulongan nen Jehova, ontan met ed masulok ya 200 a Tasi nen Jehova diad Russia ya kinasoan bilang kriminal.​—Salmo 27:1.

Basaen so kopya na imbaga nen Dennis Christensen ed Oryol Regional Court nen Mayo 16, 2019.

Basaen so kopya na imbaga nen Dennis Christensen ed Oryol Regional Court nen Mayo 23, 2019.