Diad sayan agew, man-samploy taon la manlapu nen nandesisyon so European Court of Human Rights (ECHR) nen Hunyo 10, 2010, ya susumlangen na saray autoridad na Russia so human rights diad pigay taon lan panasali dan patundaen iray agagi tayo diad panagdayew da. Ingganggan na ECHR ed Russia ya manmulta ira na baleg ya kantidad tan ipawil da so legal ya pakarehistro lamet na Saray Tasi nen Jehova diad Moscow​—ya ag-inawat na saray autoridad nen 2004.

Kayarin inyanunsio itan ya desisyon, oniay imbaga nen Brother Ivan Chaykovskiy, say chairman ed saman na Moscow Community of Jehovah’s Witnesses: “Ipapanengneng na sayan desisyon na ECHR ya taloen na inkahustisya so aliwan patas ya panagtrato ed relihyon. Komon ta lapud sayan desisyon et ipawil lan tampol na saray autoridad so legal ya karapatan mi tan ontunda lay panamairap na gobierno ed saray Tasi nen Jehova diad interon bansa.”

Balet agnambayag itan ya maong a balita, ta aglabat tinulok na saray autoridad na Russia so desisyon na ECHR noagta mas pinairap dan maong iray agagi tayo diad interon bansa. Nanengneng tayo itan nagkalalo la nen nandesisyon so Supreme Court na Russia ya isebel so mareen ya panagdayew tayo nen 2017, ya tinumbokan na saray agmahustisya ya impangaresto, impanlitis, tan impangipriso ed saray agagi tayo.

Anggaman samploy taon lay apalabas, siansian ag-anguman so desisyon na Korte nipaakar ed Russia. Nen 2010, imbaliwala na ECHR so dakel ya anggapoy basiyan ya akusasyon na Russia ya siansian gagawaen natan ed saray mareen ya agagi tayo.

Bilang sumaryo, imbaga na ECHR ya say Moscow Justice Department, pati saray korte ed Moscow, et “anggapoy legal ya basiyan da” ed agda pangiyabuloy ya nirehistro lamet iray Tasi nen Jehova ed Russia. Aliwan pabor so Korte ed gagawaen na saray autoridad na Moscow, ya imbaga ton “aliwa iran patas tan makatunongan.” Ontan met, talagan sinumlang na saray autoridad na Moscow so European Convention on Human Rights, anggaman akipakna so Russia ya suportaan itan.

Nen 2020, singa met nen 2010, say sistematikon panamairap na Russia ed saray agagi tayo et sankaimano. “Parad saray Tasi nen Jehova ed Russia, say pangitutuloy da ed panagdayew da et mankabaliksan na pangirisga ed kalayaan da,” so imbaga nen Rachel Denber, deputy director na Europe tan Central Asia parad Human Rights Watch. Diad imbaga to nen Enero 9, 2020, inyarum to: “Anggapon balot so makatunongan ya rason pian nagawa iya.”

Anggaman ed sayan ag-inkahustisya, ipipikasi tayo ed si Jehova ya tuloytuloy to komon ya pabiskegen iray agagi tayo ed Russia pian “sigpot [iran] makapansungdo a walaay anos tan liket.”​—Colosas 1:11.