AGOSTO 9, 2019
RUSSIA
Si Brother Andrzej Oniszczuk ya Mansakey Taon La ed Prisoan
Si Andrzej Oniszczuk, ya tagad Poland tan sakey ed saray inar-aron agi tayo, et impriso ed Russia antis nin litisen manlapu la nen sikatoy inaresto na saray pulis tan sundalo nen Oktubre 9, 2018. Say impakapriso to et dinmukey na anggad limaran termino. Say balon termino to ed prisoan et akaeskedyul no Oktubre 2, pigaran agew labat la antis ton nakompleto so sakey taon ya pakapriso to.
Si Andrzej, antis ya naaresto, kaibay asawa to ya si Anna. Manlapu la nen apriso si Andrzej, samploy bulan lay apalabas, agnaabuloyan si Anna ya ombisita ed sikato
Manlapu lad impakapriso nen Andrzej, sikatoy imbiig kanian bukbukor to labat ed prisoan. Manlapud ala-6 na kabuasan ya anggad alas-9 na labi, sikatoy agnayarin ondukol. Naabuloyan labat ya manames na ampetang maminsan ed sakey simba diad loob na 15 minuto. Say asawa ton si Anna et ag-inabuloyan ya ombisita ed sikato legan ton walad prisoan diad loob na samploran bulan. Makapantongtong labat iran dua panamegley na sulat. Aminpigapigan kinmerew si Anna na permiso ed saray autoridad pian nabisita toy Andrzej, balet agda inabuloyan.
Unong ya imbalita la, kayarin ni-raid na saray pulis tan special forces ya asakoban so lupa ra so abung nen Andrzej, sikatoy inaresto da. Ni-raid da met so 18 nin abung na agagi ed Kirov. Inakusaan na kason kriminal si Andrzej lapud pangakansion to na saray Kingdom song tan lapud panaaral to ed saray literatura ya walay koneksion tod relihyon.
Si Andrzej, kaiba so apatira nin agagi ed Kirov (Maksim Khalturin, 44 años; Vladimir Korobeynikov, 66 años; Andrey Suvorkov, 26 años; Evgeniy Suvorkov, 41 años), et inaresto nen imbeneg a taon tan impriso ira antis iran litisen. Kayari na satan et in-house arrest ira. Aalagaren nen Andrzej tan sarayan apatiran agagi so desisyon na European Court of Human Rights ed kaso da.
Diad sayan taon, inakusaan na saray autoridad ed Russia na kason kriminal iray pitora nin agagi ed Kirov—say sankatatkenan ed sikara et si Yevgeniy Udintsev, 70 años. Ami-amin et 12 ya Tasi nen Jehova ed Kirov so walaan na kason kriminal lapud papanisiaan da.
No nipaakar ed si Andrzej, Anna, tan arum nin inar-aron agagi tayo ed Russia, komon ta agtayon balot lilingwanan so bilin na Biblia: “Nodnonot yo iramay walad prisoan a singano kaiba da kayon apriso, tan saramay mamaltratoen, lapud sikayo met a mismo et manbibilay ni diad dalin.”—Hebreo 13:3.
