Impriso Lapud Pananisia Ra—Singapore

I-PLAY

Akapriso so 8 ya kabataan ya Tasi nen Jehova diad Singapore lapud agnaako na konsiensia da so pansundalo. Talora ed sikara so senentensiaan na komaduan termino na pakapriso lapud nansiansia iran mapekder ed papanisiaan da kayari na unonan termino na impakapriso da. Ag-ira nayarin onkerew na legal ya tulong ed Singapore lapud impaakseb na gobierno diman ya kapilitan a mansundalo iray lalaki ed bansa ra tan agbibidbiren na gobierno so kanepegan na sakey ya agmansundalo lapud agnaako na konsiensia to.

No say sakey a laki et mantaon lay 18, kapilitan ya mibiang ed militar na Singapore. Balet no agto gawaen itan lapud agnaako na konsiensia to, ipriso da ya anggad 12 bulan diad kampo na militar. No asumpal to lay sentensia to, ibulos da la insan da iganggan ya mansulong na unipormi na sundalo tan man-training parad militar. Balet no agto lamet gawaen iratan, litisen da lamet tan ipriso da ya anggad 18 ya bulan. Kanian saray kabataan ya Tasi nen Jehova ya agmansundalo et sesentensiaan na duaran mantumbokan ya pakapriso, ami-amin et anggad 30 ya bulan iran napriso.

Aglabay ya Unoren na Singapore so Totontonen na UN

Abayag lan onaapela so United Nations ed saray bansa ya membro na satan ya “awaten dan say agpansundalo na sakey no agnaako na konsiensia to et legal lapud kawayangan ed panagnonot, konsiensia, tan relihyon ya bibidbiren na Universal Declaration of Human Rights.” Anggaman say Singapore et membro la na UN manlapu nen 1965, ag-itan pabor ed totontonen na United Nations nipaakar ed isyu ed pansundalo. Diad sakey a sulat ya apetsaan na Abril 24, 2002 ya aka-address ed UN Commission on Human Rights, imbaga na sakey ya opisyal na gobierno na Singapore ya “no say papanisiaan tan gagawaen na sakey a too et onsusumlang la ed [kanepegan na bansa ya mangidepensa], nepeg ya manunan ikonsidera so kanepegan na bansa ya pansiansiaen so seguridad na satan.” Oniay malinew tan mapuersan insulat na saman ya opisyal: “Agkami mipakna ya onaplika ed amin ya bansa so pangiyabuloy ed sakey a too ya agmansundalo lapud agnaako na konsiensia to.”

Apriso Lapud Agnaako na Konsiensia To so Mansundalo

Chuang Xu Daniel Poh

Inyanak si Chuang Xu Daniel Poh nen 2003 tan Tasi nen Jehova so nanay to. Sinmabi panaon ya nanaral na Biblia si Daniel tan say duaran agagi to tan mimilmila met so aliwan Tasi ya tatay to. Lanang dan pantotongtongan ya sankapamilya iray nanaaralan da ed saray aral na saray Tasi nen Jehova odino diad personal ya panag-aral day Biblia tan inagew-agew iran manpipikasi ya saniiba. Mas inmapit so ulopan dan sankapamilya legan iran saniiban mandadayew ed Dios da ya si Jehova.

Legan ya ombabaleg si Daniel, mas seseryosoen to lay relasyon to ed si Jehova. Antoy akakombinse ed sikato ya nalmo to lay katuaan? Oniay kuan to: “Diad gapo, lapud mahilig ak ed history, talagan labalabay kon aralen iray kasumpalan na saray propesiya na Biblia. Say sakey ya alimbawa et say propesiya nipaakar ed kaderal na Babilonia ya nipasakbay la duan lasus ya taon antis ya nagawa. Imbaga na Biblia no panon ya naekatan so Ilog Eufrates tan no panon ya looban na saray armada na Medo-Persia so syudad na Babilonia tan deralen da itan. Tan eksakton agawa no antoy akapropesiya. Komadua, anengneng ko no panon ya makakatulong iray prinsipyo na Biblia ed siak tan ed pamilyak no tutumboken mi iratan, kompara ed saray totoo ya ag-onuunor ed satan. Talagan misatsalamat ak ta amtak ya dugay pinilik ya paraan na panagbilay.”

Iilaloan la nen Daniel ya ka-graduate tod eskuelaan et seguradon napriso no agto unoren so ganggan ya mansundalo ta ag-itan naako na nipasal ed Biblia ya konsiensia to. Balet no bilang ta ikdan day kimey ya agmikonektaan ed pansundalo, mabulos ton gawaen itan. Mapaga si Daniel ya niyarawi ed saray kapamilya to ta kaslakan et sikatoy ibabaki ra no wala ray kaukolan da. Pero antis ya natawag ya mansundalo, nandesisyon ya idedikay bilay to ed si Jehova nen 2023. Nen Agosto 2023 inaresto da, nilitis da, tan senentensiaan da ya napriso. Duaran tan kapalduan taon ya napriso si Daniel, pero iilaloan to ya nakaiba to lamet iray inaro tod bilay no Pebrero 2026.

Time Line

Agosto 16, 2024

Ami-amin et 8 ya Tasi nen Jehova so akapriso lapud agnaako na konsiensia ra so pansundalo.
Abril 24, 2002

Kinompirma na sakey ya opisyal na gobierno ya agbibidbiren na Singapore so kanepegan na saramay agmalabay a mansundalo lapud agnaako na konsiensia ra.
Pebrero 1995

Linmoor so panameget tan panag-aresto ed saray Tasi nen Jehova ya citizen ed Singapore.
Agosto 8, 1994

Agdinengel na Atagey a Korte na Singapore so apela na saray Tasi.
Enero 12, 1972

Kinansela na gobierno na Singapore so rehistro na Saray Tasi nen Jehova.

Ompan Nagustoan Mo Met

BALITA

Saray Lugar ya Wala ray Tasi nen Jehova ya Impriso Lapud Pananisia Ra

Saray lugar ya wala ray Tasi nen Jehova ya impriso lapud pananisia ra tan lapud gagawaen da iray manunan kanepegan da bilang too. No maminsan et mair-irap so kipapasen da ed saratan ya prisoan.

BALITA