SETYEMBRE 20, 2019
SOUTH KOREA

Seoul, South Korea—2019 ‘Say Aro Agbalot Mangangga’! Internasyonal a Kombension

I-PLAY

Petsa: Setyembre 13-15, 2019
Lugar: KINTEX (Korea International Exhibition Center) diad Seoul, South Korea
Lenguahe na Programa: Chinese Mandarin, English, Indonesian, Korean, Russian, Vietnamese
Inmatendi: 60,082
Abautismoan: 478
Bilang na Imbitadon Delegate: 6,076
Imbitadon Branch: Brazil, Czech-Slovak, Finland, France, Greece, Indonesia, Kazakhstan, Malaysia, Scandinavia, United States, Vietnam
Eksperiensya: Oniay imbaga nen Choi Ji-woong, CEO na sakey a kompanya na catering ya angitarya na naakan parad saray delegate: “Imbaga na sakey ya empleyado mi ya anengneng tod sayan proyekto ya talagan maomaong iray Tasi. Pandinayewan ko so aroan na saray Tasi ya nanlapud arum ya bansa tan saray Tasi ed Korea anggano natan ni ra labat akapankabat. Singa ira maapit ya sankakaaro ya akapannengnengan lamet. Dakel lay nantrabahoan kon okasyon na saray relihyon, pero duma iyan okasyon na Saray Tasi nen Jehova, talagan espisyal.”

Oniay imbaga nen Ahn Seon-ju, walaan na atagey ya posisyon ed Eutteum Tour Agency: “Nen anengneng ko ya maomaong tan naynay ya akaimis iray Tasi nen Jehova, naisip kon maabig no panonotan iray driver na bus mi ya aligen da itan. Nen unaan, iisipen ko no anto kasi sekreto na saray Tasi, balet legan kamin mikikimeyan ed sikara, talagan pambiliban ko so panangaro tan respeto da ed sakey tan sakey tan gagawaen da no antoy ibabangat da. Pankelawan ko nen naamtaan kon anggapoy sueldo ra ed saray gagawaen da. Naisip ko no panon ak met ya manguman legan ko ran oobserbaan ya dedengelen day sakey tan sakey tan naynay iran akaimis. No wala ni arum ya pankanawnawa, labay koy makapantrabaho lamet ed Saray Tasi nen Jehova diad arapen.”

Oniay imbaga nen Kim Gyo-Shik, management director na MBC Munhwa Broadcasting Station Dae-jang-geum Theme Park: “Talagan balibali so tour ya imparaan na Saray Tasi nen Jehova. Anggano Katoliko ak, anengneng ko ed sayan okasyon no panon so nepeg ya ikiwas na saray tuan Kristiano. Naobserbaan na saray empleyado mi, anggan siak ya mismo, ya saray Tasi et organisado tan walaan na kooperasyon. Maomaong ira ed arum tan ipapatanir da ni ingen no mangusar ira na anggan melag ya gamit ed pasilidad mi. Pakaliknak et singa ak met sakey ed Saray Tasi nen Jehova, talagan proud ak ed sikara.”

Malikeliket iray agagi ya manwe-welcome ed saray delegate ya onsasabi ed airport manlapud arum ya bansa

Saray delegate ya manpa-public witnessing kaiba iray agagi diad satan ya lugar

Iwe-welcome na saray sister iray delegate ed venue na kombension diad kabuasan

Lilitratoen na sakey a delegate so sister ya tagad Korea ya kaiba toy ugaw nin anak ton bii

Say baleg a grupo na saray inmatendi ed kombension legan iran ondedengel ed sesyon diad Sabado

Ipapatalos na brother iray tepet parad bautismo ed sakey ya brother ya emel tan bulag panamegley na tactile signing

Taloran sister ya madengedengel tan mannonota legan na kombension

Ipapaliwawa nen Brother Stephen Lett so sampot ya parte diad Sabado

Say litrato na anemiran baptismal pool ya inusar diad Sabado

Manpapayapay ed audience iray agagin walad special full-time ya nanlapud arum ya bansa diad sampot na programa na Simba

Grupo na saray inmatendi ed kombension, say arum et akasulong na tradisyonal ya kawes, saniiba iran akaalagey ya manpapalitrato

Diad open house ed Bethel na Korea, saray delegate ya nanlapud arum ya bansa et nenengnengen da iray litrato na dakdakel ya agagi ya nansiansian matoor ed si Jehova anggano asubok ira.

Manpapalitrato iray delegate ya nanlapud arum a bansa kaiba iray agagin tagad Korea diad sakey ed saray impan-tour da

Manpapalitrato so sakey a grupo na saray sister ya nan-perform na tradisyonal a sayaw ed Korea a tatawagen ya buchaechum ed saray delegate ya nanlapud arum ya bansa