Legan na sayan pandemic, dakel ya agagi so mansasagpot pian ligliwaen iray totoo panamegley na pangiter na makapaseseg iran sulat ed sikara. Si Brother Josué Laporta tan say asawa to, si Vanesa, et angiter na makapaseseg ya sulat parad saray mantratrabaho ed ospital tan ed saray pasyente na COVID-19 diad sakey ya ospital ed Barcelona, Spain. Akaawat ira na sulat na pisasalamat manlapud sakey a nurse. Nanengneng ed leksab so sulat to, tan inmabuloy ya i-publish itan ya walay pananguman ya daiset. *

Sakey ak ya nurse . . . tan nansulat ak parad si bai [inekal so ngaran], ya 97 años la. Imbasa mi sulat yo ed sikara diad sayan kabuasan. Niiter mi met lad saray pasyente iray sulat ya impawit yo, balet segurado ak ya aglabat nibana iyan sulat. Duara so nanlapuan na sayan sulat, [say pasyente] tan siak . . . , lapud naamtaan min wala manayay ilalo. Agla manbayag so bilay da [say pasyente], tan imbaga dad siak ya agda labay so ontaynan ed sayan mundo ya agda nitepet iyad sikayo, Josué: “Anggan 97 lay edad ko, kasin natawayan ko ni ray balibalin promisa na Dios ya impasakbay tod Biblia?”

Diad sayan kabuasan, imbasak ya agano ed [sikara] may walad website ya imbaga yo. Agustoan day arengel da, malikeliket ira, kinmalma so liknaan da, dati et aliwa ran onman. Insan mi binantayan so video ya “Akin ya Inatey si Jesus?”

Binasak met may magasin [“Onliing!”] tungkol ed stress tan akatulong iman ed siak pian nasarag so mairap ya situasyon tayo natan. Talagan mairap yay situasyon tayo.

Anggaman anggapoy psychologist ya nakatongtong na saray mantratrabaho dia, saray impormasyon ya walad magasin tan ed website yo et available 24 oras tan sarag min dalepdepen. No nasumpal la yay pandemic, labay ko ni makaaral ed Biblia tan komon et agkayo onsasawa ya ibangat ed siak iray kaukolan kon naaralan, pian napaseguroan ak ya posible so sakey ya balibalin mundo. Misalsalamat ak ya maong ed Dios ta naawat koy sulat yo diad saman ya agew, diad mismon oras ya aka-duty ak, tan niiter ko iman ed kuarto nen [say pasyente].

Komon ta maong so kipapasen yo tan say pamilya yo, segurado ak ya lapud ilalo yo, mas nasasarag yo yay mairap ya situasyon tayo. Baleg ya salamat ed inter yon panaon ed siak tan si [say pasyente]. Anggaman agyo kami kabat, nanggawa kayoy paraan pian nalikna mi so liket diad loob na anemiran simba.

Balbaleg ya salamat.

Napapaseseg tayo ed onia iran balikas na pisasalamat pian tuloytuloy tayoy manpulong anggaman walay pandemic. Ipikasi tayo ya komon ta dugaruga iray nausar tayon salita pian naligliwa tayo iray totoo.​—Proverbio 15:23.