SETYEMBRE 17, 2019
UNITED KINGDOM
Asingger Lan Nasumpal so Pangipapaalagey na Branch ed Britain, Say Balibalin Alimbawa na Panag-landscape tan Panag-apiger
Say pangipapaalagey ed branch office diad Britain ya asingger ed Chelmsford, Essex, et iilaloan ya nasumpal no Disyembre 2019. Natan ni labat et ibabaga la na saray eksperto ya sayan proyekto et balibalin alimbawa na panangipawil ed dakep na dalin.
Nen sinaliw na saray agagi tayo so dalin nen 2015, abunton ditan iray daan lan luluganan tan bantakan itan na basura. Dakdakel ya basura so akotkot na saray boluntaryo tan in-recycle da iratan, kaiba la ray nilibon dalig—say arum et nen World War II ni wadtan. Insan da pinalinan so dalin tan ineekal da anggan saray angkekelag ya piraso na basura insan da in-recycle odino inusar lamet iratan ed duman paraan anggad posible, insan da inusar so alinisan ya dalin. Ami-amin et masulok ya 11,000 ya agagi so namboluntaryo ed masulok ya apatiran milyon ya oras pian ontulong ya parakepen so 34-ektarya ya dalin.
Kawigi: Nilinisan na saray impasal ya boluntaryo so site nen 2015; Kawanan: Agano nin litrato na balibali iran hardin
Kaiba ed sayan proyekto so pangiyan na hardin ya walay tanem ton tanaman ya kaslakan ed satan ya lugar tan say arum et nanlapud arum ya lugar, ontan met ed pokok, alog ya akataneman na dakel ya rosas, tan saray manbubungan kakiewan. Say desinyo na satan et aliwa labat ya marakep noagta ginagala met itan ya panayaman na ayayep, anggapoy nasayang ya danum, napreserba iray matatken la ran kiew tan akaalasir iran tanaman, naparakel iray native ya tanaman, tan parakepen na satan so kaliberliber na saray manaayam ditan.
Oniay imbaga nen Brother Paul Rogers, sakey a membro na Construction Project Committee (CPC): “Say asaliw min dalin et aderal la lapud agla itan naasikaso ed dakel ya taon. Inggapo so impanguman na sayan lugar diad tulong na dakdakel tan mabulbulos iran boluntaryo ya makulikulin nanlinis tan angekal na saray basura. Kaiba ed impanlinis so impangipawil ed natural ya itsura na dalin, kaiba lay impangitanem na nilasus ya balon kakiewan, tanaman, tan arum ni ra. Lapud sayan balibalin resulta, nanonotan tayo so ibabaga na Ezequiel 36:35, 36: ‘Tan ibaga na saray totoo: “Say dalin ya agpanaayaman et nagmaliw a singa hardin na Eden” . . . Tan saray nasyon . . . et naamtaan da a siak a mismo, si Jehova, so angipaalagey ed samay inggeba, tan tinaneman ko so dalin ya agpanaayaman.’”
Duaran sister ya manlilinis ed pokok ya wala ray basura. Inekal iray angkabaleg ya piraso na basura panamegley na tractor tan saray angkelag ya piraso et manu-mano ya inekal. Masulok ya 8,000 ya tanaman ya nabilay ed danum so intanem ed pokok, kanian mas malinis so danum
Sakey ed saray pokok ya kabiangan na dati lan irigasyon so mankokolekta na danum ya manlapud asingger ya karsada tan diad property na branch office. Diad bandad kawigi na litrato, walay bus stop ya walay pasen ya nayarin nabantag na saray manaayam ed satan ya lugar so balibalin hardin
Taloran lalaki ya mantratrabaho ed panag-landscape so mantatanem na kiew ed site. Inyarum so ngalngali 15,000 ya kiew, tanaman, tan arum ni
Anemiran kiew na olibo so intanem diad arap na saray opisina, ya base ed impantantsa et manga 100 taon lay bilay da
Manpapalitrato so sakey a grupo na saray sister legan iran mantatanem. Masulok ya 18,000 ya bini na rosas so intanem ed makiew ya pasen. Manga 80 porsiento na native ya tanaman so pinilin itanem parad sayan proyekto
Balibali so inkaalasir na saray rosas, tanaman, tan kiew diad paway na Residence F
Ompan Nagustoan Mo Met
MABETBET YA ITETEPET
Siopay Manpupundod Kimey na Saray Tasi nen Jehova?
Agmi uusaren iray paraan na dakel ya relihyon pian nawalaan na pundo.