LONDON—Manpapaalagey na balon branch office iray Tasi nen Jehova diad Britain. Say desinyo tan paraan na construction da et akaawat na Outstanding ya rating, say sankatagyan a rating ya nayarin iter na manunaan ya organisasyon parad sustainability assessment standard, say BREEAM (Building Research Establishment Environmental Assessment Method). Say branch office na saray Tasi et naromog manga 70 ya kilometro diad east London, diad Chelmsford, Essex, tan saya so komadua ni labat ya akaawat na sankatagyan a rating na BREEAM Communities.

Say BREEAM so pinorma na BRE (Building Research Establishment), a balitado ya building science center. Aaralen na saya so sustainability na construction project, infrastructure, tan saray building ed nanduruman kategorya: enerhiya, pankaabigan na too, moderno iran ideya, pangusar ed lote, materyales, management, polusyon, transportasyon, basura, tan danum. Insan, naamtaan no say proyekto et makaawat na Pass, Good, Very Good, Excellent, odino Outstanding. Pian aprobaan so plano na saray Tasi ed balon branch office da, kinaukolan na Chelmsford City Council ya natumbok iray sustainable design na project, sakey ed saraya et say pakaawat na minimum rating na BREEAM ya Very Good. Si Neil Jordan, ya senior planning officer directorate na Chelmsford City Council parad sustainable iran community, et nankomento ed proyekto na saray Tasi: “Malikeliket kami ta tinumbok na Saray Tasi nen Jehova iray kakaukolanen parad proyekto, alampasan da ni ingen so iilaloan na city council.” Inyarum to ni ya say proyekto et “magmaliw ya inspirasyon na interon syudad tayo pian pansagpotan dan tumboken so environmental standards.”

Kaaruman ni ed Outstanding certification, binidbir ya say desinyo na project et agmakaderal ed kalikasan. Abawasan na saray Tasi so carbon emission na 2,480 ya tonelada lapud nanayam ed construction site iray trabahador tan ilulugan da rad minibus tan arum nin sustainable ya paraan na transportasyon. Kanian akaawat iray Tasi na sankaunaan ya “innovation credit” manlapud BREEAM Communities. Imbaga nen Mr. Jordan ya say proyekto et “akatulong pian makaromog na balon paraan pian nabawasan so carbon emission diad ontan et agnaderal so kalikasan, kanian mas ni so agawaan da ya agnin balot agawaan na BREEAM Communites.”

Si Mr. Pallab Chatterjee, sakey ya BREEAM assessor, et nankomento ed eksperiensya tod pikimey ed saray Tasi tan ed pitotoo ra: “Agustoan koy liket tan inkamakaaro dad construction site, ya mataltalag la natan. Tinumbok na saray Tasi so dakel ya BREEAM sustainability items diad desinyo da. Akapokus ira ed pakatipid na enerhiya tan agpakaderal na kalikasan, imbes ya makaawat labat na BREEAM rating. Na-impress ak ed ginawa dan dakel ya konsultasyon ed lokal ya komunidad tan ed saray manayam ed pasilidad. Sakey iyad saray labalabay kon project.”

Oniay imbaga nen Andrew Schofield, ya representative na Saray Tasi nen Jehova ed Britain: “Diad ngalngali 60 ya taon, say branch office mid Britain et walad London. Balet, kaukolan mi mas baleg ya pasilidad ta dinmakel so pankaukolan na base ed Biblia iran literatura tan materyales. Ginapoan min iprepara so 34 ya ektaryan lote nen Abril 2015 tan iilaloan min nasumpal so proyekto no 2019.”

Media Contacts:

International: David A. Semonian, Office of Public Information, +1-845-524-3000

United Kingdom: Andrew Schofield, +44-20-8906-2211