Say Bagyon Dorian, sakey ed saray sankakasilan ya bagyo ed Atlantic Ocean, et nan-landfall bilang Category 5 diad Great Abaco Island ed northern Bahamas nen Simba na kabuasan, Setyembre 1, 2019. Mapeligro so bagyon Dorian lapud matantan so galaw to tan maksil so dagem tan uran to. Dinalan na bagyo so Leeward Islands, Puerto Rico, tan Virgin Islands balet ta daiset labat odino anggapo ni ingen so nireport ya aderal.

Tuloytuloy nin mangaala na impormasyon so branch office na United States legan dan imo-monitor so epekto na bagyo ed saray agagi tayo tan ed saray pasilidad ya kayarian na organisasyon. Anggapo ni inreport ya arisgo ed saray 46 ya manangipalapag na duaran kongregasyon ed Great Abaco Island. Balet ta aderal imay saksakey ya Kingdom Hall ed isla.

Walay apatiran kongregasyon diad Grand Bahama Island tan 364 so manangipalapag. Naamtaan ed saray akaunan report ya 196 ya agagi so nan-evacuate tan 22 ya abung so apektado. Tan taloran abung so aderal ya maong.

Antis ni na bagyo et angiter lay instruksion so branch ed saray manangasikaso na sirkito tan saray elder ed saray apektadon lugar. Insuheri na branch ya amin ya agagi et onalis ed syudad na Nassau odino diad arum ni ran ligtas ya lugar.

Ipikasi tayo iray agagi tayo ya nanairapan lapud resulta na makmaksil ya bagyo. Amta tayon nanenengneng nen Jehova so paniirap da tan tuloytuloy to ran ikdan na biskeg pian nasarag da iyan mairap ya panaon.​—Salmo 46:1, 2.