NEW YORK—Parad saray atateng ed United States, say panag-bully so manunaan ya problema na saray ananak da, base ed 2017 C.S. Mott Children’s Hospital National Poll on Children’s Health, ya in-survey ed University of Michigan.

Say website ya stopbullying.gov, ya walad panangasikaso na U.S. Department of Health & Human Services, et ipapaamta to so posiblin rason ya manpaga iray atateng: Ipapanengneng na saray napanmatalkan ya impan-research ya manga 30% na saray estudyante ed U.S. et asali da lay a-bully ed eskuelaan.

Inkuan nen David A. Semonian ya representative na Saray Tasi nen Jehova diad world headquarters dad New York: “Amta mi ya say panag-bully et sakey a panlapuay problema na saray ugugaw. Kanian kaiba ed kimey min panagbangat na Biblia iray ipro-produce min makatulong pian arapen so panag-bully tan arum nin problema na saray pamilya. Diad loob na manga limay taon, minilyon lan pamilya ed interon mundo so atulongan na whiteboard animation video mi ya Taloen so Bully ya Agmilalaban.”

Sayan video, ya kulang ya apatiran minuto so karukey to, et available ed official website na Saray Tasi ya jw.org ed masulok ya 280 lenguahe, kaiba lay masulok ya 30 sign language.

“Agustoan kon maong so concept na video ya Taloen so Bully ya Agmilalaban, ta singa bilang, diad bansa mi, no maminsan et ibabangat na saray atateng so ananak da ya milaban pian nasolusyonan so problema,” so kuan nen Natalia Cárdenas Zuluaga, coordinator na Child and Adolescent Mental Health graduate program ed CES University diad Colombia. “Parad siak, balibalin advice so iiter na video ed saray ugugaw ya nabu-bully. Sakey ni, walay importantin katuaan ya ipapasabi na video tungkol ed panag-bully: Ya anggan siopa et na-bully lapu labat ta sikatoy duma. No natalosan iya na saray ugugaw, magmaliw iran kalmado tan nawalaan ira na respeto tan kompiyansa ed sarili.”

Imbaga nen Dr. Jun Sung Hong ya assistant professor ed Sungkyunkwan University diad South Korea: “Lapud singa cartoon so format na video, aliwa labat ya makatulong noagta balibali met itan ya bantayan, lalo la na saray ugugaw ya nabu-bully. Manisia ak met ya mas natandaan na saray binmantay so karga na video lapud saray cartoon ya anengneng da.”

Ontan met, inkuan nen Dr. Shelly Hymel, sakey ed saray founder na Bullying Research Network: “Parad siak, marakep so mensahe na video parad saray ugugaw tan mipara itan ed saray impan-research ya amtak. Balibalin usaren na saray atateng, mamaestro tan mamaestra, odino arum nin adulto no igapo ray discussion ya kaiba iray ugugaw tan kabataan.”

Inkuan ni nen Mr. Semonian: “Concerned kami ed saray ugugaw ya nabu-bully tan iilaloan mi ya makatulong iray tips ed video mi. Singa irerekomenda na sayan video, kaukolan ya ibaga na saray kabataan so problema da ed sakey ya panmamatalekan da, lalo la ray atateng da odino sakey ya maestro, ya makapangiter na giya tan suporta. Agda kaukolan ya arapen a bukor so panag-bully.”

Media Contact:

David A. Semonian, Office of Public Information, +1-845-524-3000