Siansia nin magulogulo tan mair-irap so situasyon ed Venezuela. Mairap so makaala na naakan, danum, gasolina, tan tambal lapud kulang so suplay tan mabmabli iratan. Lalon linmoor so eras ta naynay ya anggapoy kuryente tan ag-ira makausar na refrigerator. Lanang ya mapagpaga iray totoo lapud saray krimen.

Balet anggano mair-irap so situasyon, tuloytuloy nin maseseg ya manpupulong so masulok ya 136,500 a manangipalapag diad Venezuela. Singa bilang, nen Enero 2019, anggano abawasan na 7,000 so bilang na saray manangipalapag no ikompara ed apalabas ya taon, inmatagey na 90,000 so oras ya inusar da ed ministeryo. Nen Abril 2019, masulok ya 195,600 so nikondukta ya panangiyaral na Biblia. Say bilang na saray regular payunir et asabi toy 30,000. Legan na espisyal ya kampanya ed interon mundo ya panangimbita parad Memoryal na impatey na Kristo, say bilang na nan-auxiliary payunir et asabi toy 20,400. Seguradon akatulong iyan impansagpot na agagi kanian ngalngali 471,000 so inmatendi ed Memoryal, mamitlon beses ya mas dakel nen say bilang na saray manangipalapag. Ontan met, dakdakel so onaatendi ed saray aral na kongregasyon. Say sakey ya rason et lapud tuloytuloy ya ipapasabi na saray agagi so mensahe na Biblia ed saray totoo ya manaanap na napantiwalaan iran solusyon ed saray problema da.

Tuloytuloy ni ya oorganisaen na Venezuela branch so pangiter na relief ed saray agagi tayo pian nitarya iray manunan pankaukolan da ed panangan. Diad tulong na asingger iran branch tan saray mabulos ya donasyon na agagi parad sankamundoan a kimey, binulan ya mangiiter so Venezuela branch na nilasus a tonelada na naakan ed saray 75,000 ya manangipalapag ed 1,595 ya kongregasyon.

Dakel so kairapan ya susungdoan na saray agagi tayo ed Venezuela, balet napapaseseg itayo ta ‘maliket ni ran siansia ed si Jehova tan manggagayaga ra ed Dios na kilalaban da.’​—Habacuc 3:17, 18.