Lapud teknolohiya, mainomay lan kontaken iray totoo anggan anton oras. Kanian ompan iilaloan na amom, saray katrabahom, odino kustomer mo ya sarag da kan kontaken anggan anton oras tan anggan anton agew. Balet lapud satan et ompan mairap mo lan nabalanse so bilay mo tan ompan napaulyanan mo lay arum ya importante ed sika, kaiba lay asawam.

•  No antoy nepeg mon naamtaan

•  Saray tip pian magmaliw kan balanse

•  No antoy ibabaga na kaasawaan

•  Giya ed pantongtong

•   Lapud teknolohiya, nayarin naala na trabahom so panaon mo ya para komon ed asawam. Kanian kada walay ontawag, man-email odino man-text nipaakar ed trabaho, ompan say pakaliknam et obligado kan ebatan iratan ya tampol anggano wala ka lad abung.

   “Singa imposible la natan may simplin bilay ya kasempet mod abung kayari trabahom et pamilyam lay imanoen mo, kasi no walay man-email tan ontawag, atan lay unaen mo nen say asawam.”—Jeanette.

•   Pian magmaliw kan balanse, kaukolan moy onaksion. Ta no agka manplano, seguradon nipeligro so relasyon mod asawam lapud trabahom.

   “Kaslakan, say asawam so unonan nisakripisyom ta ompan isipen mon, ‘Di bale ta natalosan to ak. Perdonaen to ak man. Tan nakaibak lanlamang naani.’”—Holly.

•   Iyunam so asawam. Ibabaga na Biblia: “Say impankasakey na Dios et agnepeg a pansianen na too.” (Mateo 19:6) No agka ompayag ya “pansianen” kayo na too, seguradon agka met ompayag ya pansianen kayo na trabaho, di ba?

   “Iisipen na arum ya kustomer ya lapud babayaran da ka et sarag da ka lan tawagan ed anggan anton oras no kaukolan da ka. Balet lapud mas manuna so asawak ed bilay ko, ibabagak ed sikara ya agak nayari no day-off ko. Pero ipapasegurok ya kontaken ko ran tampol no available ak la.”—Mark.

   Tepetay sarilim, ‘Kasin nanengneng ed saray gagawaen ko ya mas importante ni asawak nen say trabahok?’

•   No nakaukolan, ibagam ya agmo nagawaan so trabaho. Ibabaga na Biblia: “Say karunongan et walad saray mapaabeba.” (Proverbio 11:2) No mapaabeba ka, makatulong itan pian nibagam ya agmo nagawaan so sakey ya trabaho odino ipagawam la itan ed arum.

   “Tubero ak, et no agko nagawaan so sakey ya trabaho ya kaukolan ya sumpalen a tampol, seguradon na-stress so manpapagawa. Kanian ibabagak ya mas maong no ipagawa da lad arum.”—Christopher.

   Tepetay sarilim: ‘Akaparaan ak kasin mangibaga ya agko nagawaan so sakey ya trabaho no amtak ya napaulyanan koy asawak lapud satan? Manisia kasi asawak ya talagan ontan so gawaen ko?’

•   Manggaway eskedyul ya nakaibam so asawam. Ibabaga na Biblia: “Walay panaon na amin a bengatla.” (Eclesiastes 3:1) No kapigan busy kan maong ed trabaho, atan so panaon ya kaukolan mon iyeskedyul ya nakaibam so asawam tan seguroen mon natoor mo itan.

   “Kaslakan, no mantatabunan lay trabaho mi, wala lay tongtongan mi nen asawak ya dapat makapaniba kami ya sikamin dua labat, anggano saniba kami labat ya mangdem odino manakar ed gilig na dayat.”—Deborah.

   Tepetay sarilim: ‘Kasin walay iyeeskedyul kon panaon ya nipokus koy atension ko ed asawak? Nibaga kasi na asawak ya talagan gagawaen ko itan?’

•   Erepen iray gadyet. Ibabaga na Biblia: ‘Seguroen no anto ray mas importantin bengatla.’ (Filipos 1:10) Sarag mo kasin erepen sagpaminsan so gadyet mo pian agka nadisturbo ed saray tawag manlapud trabahom?

   “Talagan pansasagpotan kon itunda lay trabahok kayari na espisipikon oras. Insan ko eerepen iray notification na cellphone ko.”—Jeremy.

   Tepetay sarilim: ‘Kasin pakaliknak et obligado ak ya magmaliw ya lanang ya available agla pigan kaukolan ak na amok odino kustomer ko? Antoy ebat nen asawak ed saya?’

•   Magmaliw ya makatunongan. Ibabaga na Biblia: “Naamtaan komon na amin a totoo a makatunongan kayo.” (Filipos 4:5) Siempre, no maminsan et nayarin onsalet so trabaho legan ya saniba kayon dua nen asawam. Singa bilang, ompan lapud klase na trabaho nen asawam et kaukolan ya mainomay ya nakontak anggan kayari na oras na trabaho. Mas maabig no makatunongan ka ed iilaloan mon karakel na panaon ya iter na asawam ed sika.

   “Walay melag ya negosyo nen asawak, tan kayari na oras na trabaho et mabetbet ya wala ni kaukolan ton asikasoen. No maminsan et makasyodot ak met, pero dakel met so panaon min saniba kanian ayos labat ed siak.”—Beverly.

   Tepetay sarilim: ‘Kasin natatalosan ko ya dakel so trabaho nen asawak kanian agko la masyadon aanapen so mas dakel ya panaon to parad siak? Antoy ebat nen asawak ed saya?’

 Unona, itepet yo nin mismo ed sarili yo irayan tepet. Insan yo pantongtongan ya dua iray ebat yo.

•   Wala la kasi agawan nanreklamoy asawak lapud insempet koy trabahok ed abung? No on, kasin walay katunongan to?

•   Anto ran pananguman so nayarin gawaen ko pian magmaliw ak ya balanse?

•   Kasin wala ray panaon ya isesempet na asawak so trabaho to? No on, anto ray nanonotan mon agawa?

•   No bilang ta wala ray labay mon umanen na asawam pian magmaliw ya balanse, anto iratan?