Iisipen na arum ya sanasawan walay problema ed relasyon da ya mas maong lay mandiborsyo ira nen say nanengneng na ananak da so agla maliket ya relasyon da. Balet antoy ipapanengneng na saray resulta?

•  Anto ray epekto ed ananak no mandiborsyo so atateng da?

•  Magmaliw kasin mas maliket so ana’ko no midiborsyo ak?

•  Antoy kaukolan kon naamtaan nipaakar ed pamabaleg ed anak mi anggan nandiborsyo kami la nen asawak?

•  Kasin wala ni mas marakep ya gawaen mi?

 Base ed research, talagan aliwliwa so epekto ed ananak no mandiborsyo so atateng da. Nia ray posiblin epekto ed ananak:

•   makalikna ira na sanok, kapagaan, tan depresyon

•   sakitan da so sarili da odino arum

•   nairapan ya manaral odino ontunda la ran manaral

•   mainomay iran nawalaan na sakit

 Ontan met, tetetelen na arum ya ananak so sarili da ed impandiborsyo na atateng da. Balanglan iisipen da ya ompan sikaray rason odino wala komon so ginawa da pian napigilan itan.

 Say aliwliwan epekto ed ananak no mandiborsyo so atateng da et nayarin mantultuloy anggad ibaleg da, nayarin abebbeba so pakanengneng dad sarili da tan mairap da lay mantiwala ed arum. Sakey ni, walay posibilidad ya midiborsyo met ira no walay problema na relasyon dad asawa ra.

 Tandaan: Anggaman iisipen na arum ya mannononot a midiborsyo ya mas maong ni itan parad saray ananak da, aliwan ontan so ipapanengneng na saray ebidensya. “No mandiborsyo so atateng, magmaliw ya miserable so bilay na ananak da,” so insulat na childcare expert ya si Penelope Leach. a

 Prinsipyo na Biblia: ‘Anap yo so pankaabigan na arum, aliwan say pankaabigan yo labat.’—Filipos 2:4.

 Say ebat na arum ed satan ya tepet et on. Balet tandaan ya aliwan naynay ya pareho so pankaukolan na ateng ed pankaukolan na anak. Labay na sakey ya midiborsyo ya manguman so bilay to. Say labay na anak balet et agmanguman so bilay to tan mansiansia ya saniba so atateng to.

 Kayarin inaral so nilibo iran kaso na impandiborsyo, oniay insulat na saray autor na libron The Unexpected Legacy of Divorce: “Malinew so mensahe: Ibabaga na ugugaw ya ag-ira maliket. Imbes, ibabaga da, ‘Nen nandiborsyo so atateng ko, agla maliket so impanugaw ko.’” Ibabaga met na saman ya libro, ya ipapasen na saray ananak ya say mundo et “agla napantiwalaan, agla maligen ya napanayaman ta say relasyon na duaran sankaapitan lan too ed bilay da et mainomay ya abuyak.”

 Tandaan: Seguradon agmaliket iray ugugaw no mandiborsyo iray atateng da.

 Prinsipyo na Biblia: “Say nagogonigon ya espiritu et mangupot na biskeg.”​—Proverbio 17:22.

 Sasalien na arum ya sanasawan nandiborsyo ya pabalegen so anak da anggan nandiborsyo la ra, iisipen dan sarag da nin siansia ya gawaen so responsabilidad da bilang atateng. Balet, mairap itan ya gawaen. Base ed research, maslak ed saray nandiborsyo ya atateng et:

•   daiset lay panaon da ed ananak da

•   nandumaan so ibabangat da ed ananak da

•   iiter dan amin so labay na ananak da ta nakokonsiensia ira odino naksawan la ira

 Nayarin agla dengelen na anak so ibabaga na atateng to. Ompan isipen to ya agmet matoor so atateng to ed sipan dan maniba ira legay bilay. ‘Akin et dengelen ko ira ey?’ so nayarin irason to.

 Tandaan: No mandiborsyo so sanasawa, mairap dan gawaen so responsabilidad da bilang atateng. Balet mas mairap itan parad saray ananak da.

 Prinsipyo na Biblia: “Agyo papasyodoten iray ananak yo, pian ag-ira nadismaya.”​—Colosas 3:21.

 Kaslakan lan mas maabig no usaren na sanasawa so panaon tan biskeg da pian ayosen so relasyon da nen say naeksperiensya da ni iray aliwliwan epekto no midiborsyo ira. “Agto labay ya ibaga ya no walay problema ed relasyon na sanasawa et aglan balot itan naayos,” so imbaga na libron The Case for Marriage. “Diad ilabas na panaon, saray sanasawan agmandidiborsyo anggan walay problema da et magmaliw ya mas maliket.” Kanian mas maong so epekto ed ananak no agmandiborsyo iray atateng da.

 Balet, agto labay ya ibagan agbalot nayari so pandiborsyo. Diad tua, aabuloyan na Biblia so pandiborsyo na sanasawa ya say rason et seksual ya imoralidad. (Mateo 19:9) Balet, ibabaga met na Biblia ya “samay makabat et dadalepdepen toy kada gawaen to.” (Proverbio 14:15) Antis ya mandiborsyo so sanasawa, kaukolan ya ikonsidera dan amin​—kaiba lay epekto na satan ed ananak da.

 Siempre, kaukolan so baleg a sagpot parad saramay pinili da ya agmidiborsyo. Mangiiter so Biblia na balibali iran bilin pian niwala ed sanasawa iray kualidad pian magmaliw ya maliket so relasyon da. Agla itan pankelawan lapud say autor na Biblia, si Jehova, so nanlapuan na uksoyan na panangasawa.​—Mateo 19:4-6.

 Prinsipyo na Biblia: “Siak si Jehova a Dios mo, say mangibabangat ed sika pian nagunggonaan ka.”​—Isaias 48:17.