Kasin imbaga la na asawam ya naaaburido ed kakainum mo? No on, wala sirin iray kaukolan mon ikonsidera.

Diad sayan artikulo

•  Deralen na panagbuanges so relasyon na sanasawa

•  Kasin sobra lay kakainum mo na alak?

•  Paliisan moy manbaraan

•  No antoy nagawaan mo

 Dakdakel so naalan sakit ed panagbuanges, kaiba lad tay sakit ed puso, sakit ed altey, tan cancer. Pero aliwa labat ya sakit so iter na panagbuanges ta nayarin pansengegan met itan na problema na sanasawa. Nayarin atan so gapoan na inkaruksa ed pamilya, problema ed kuarta, agpanmatoor ed asawa, tan pansian.

 Ibabaga na Biblia ya no sobra so inumen ya alak, “mangetket itan tan mangipaway na dita a singa sakey ya uleg.” (Proverbio 23:32) Panon mon nibaga ya sobra lay kakainum mo na alak?

 Makatulong irayan tepet pian naamtaan mo iray palatandaan:

•   Kasin nanairapan kan kontrolen so kakainum mo?

•   Kasin lanang mon sankanonot no kapigan ka lamet oninum?

•   Kasin oniinum ka nin siansia anggano wala la iray onlelesan problemam lapud satan tan apektado lay relasyon yon sanasawa?

•   Kasin aliwliway liknaan mo no sasalien mo lan itunday iyinum?

•   Kasin napankokolkolan yo la nen asawam so kakainum mo?

•   Kasin mas dakel lay iinumen mon alak natan nen say dati?

•   Kasin iyaamot-amot moy iyinum mo odino mangiyaamot kay alak diad abung yo odino diad trabahom?

 No on so ebat mo ed sakey odino masulok ni ed saratan ya tepet, ompan talagan sobra lay kakainum moy alak.

 Kasin imbaga la na asawam ya naaaburido ed kakainum mo? No on, ompan sinalim ya ibaliwala labat so imbaga na asawam odino nambaraan ka. Ompan tinetel mo ni ingey arum kaiba lay asawam tan imbagam iraya:

•   “No maong komoy panagtratom ed siak, di agak la oninum.”

•   “No makapa-stress so trabahom ya singa samay trabahok, ay talagan oninum ka met.”

•   “Wala ni arum ya totoon alabas ni kakainum da nen say siak.”

 No ibabagam iratan, agkasi mas importante lad sikay iyinum moy alak nen say magmaliw ya maliket so relasyon yon sanasawa? Pero antoy dapat ya mas importante ed sika?

 Prinsipyo na Biblia: “Say lakin walaay asawa et mapaga ed . . . no panon ton napaliket so asawa to.”​—1 Corinto 7:33.

•   Dengel moy ibabaga na asawam. Anggano masyadoy panaaburido na asawam ed kakainum mo, ompan wala met so nagawaan mon pananguman? No agmo sarag so manguman tan tuloytuloy ni kakainum mo anggano nanaaburido lay asawam lapud satan​—palatandaan itan ya sobra lay kakainum moy alak.

   Prinsipyo na Biblia: “Mantultuloy komon ya anapen na kada sakey so pankaabigan na arum a too, aliwan say dilin pankaabigan to.”​—1 Corinto 10:24.

•   Amtaen iray kaukolan ya impormasyon. Pian manalo so sakey ya sundalo ed guerra, dapat amta to ray taktika na kalaban to. Singa ontan met iyan subok ya aarapen mo natan. Pian natalom iyan kalaban mo, kaukolan mon aralen iray impormasyon nipaakar ed sobran kakainum na alak tan no panon ya naiingganyo iray totoo ed satan. Kaukolan mo met ya aralen no antoy gawaen mo pian naitundam lay sobran kakainum na alak tan no antoy gawaen mo pian agmo la napawil itan.

   Prinsipyo na Biblia: “Itultuloy yon paliisan iray pilalek na laman, a milalaban ed sikayo.”​—1 Pedro 2:11.

•   Manpatulong ka. Wala ray health-care program parad saray sobray kakainum day alak. Kaibad satan iray programa no panon iran natulongan ya onabig, tan wala met iray pasilidad tan ospital ya pampatambalan. Sarag mo met so manpatulong ed sakey ya makalakal ya kaarom, amay tulongan to kan naamtaan so arum nin problema ya mamapaloor ed kakainum moy alak. Tan no bilang ta natutukso kan oninum lamet, manpatulong ka lamet ed satan ya kaarom.

   Prinsipyo na Biblia: “Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17.

 Komplikado ya problema so sobran kakainum na alak tan ag-itan basta nasolusyonan na pambasa na antikey ya artikulo. Tan agmet itan bastabasta nitunda diad pangibagan, “Sige, salien kon bawasay kakainum ko.” Balet kaukolan mon tandaan ya aliwa labat ya say laman mo so apektado ed no panon mon arapen iyan problema, noagta apektado met so relasyon mo ed asawam.

 Parad kaaruman ya impormasyon: Basaen irayan artikulo pian naamtaan mo no panon ya nakal na arum so sobsobran kakainum na alak.

 “Aliwa Ak Lan Maruksan Too”

 “Agko La Ibabaing so Sarilik”

 “Say Karsada so Nagmaliw ya Abung Ko”

 Bantayan met so video ya ‘Sinmawa Ak La ed Bilay Ko’